Մենք տեսնում ենք, որ Ռուսաստանն այս պահին շահագրգռված չէ հարավում, այսինքն այս տարածաշրջանում պատերազմով եւ ամեն կերպ խուսափում է դրանից: Այս մասին NEWS.am-ի հետ զրույցում նշեց թուրքագետ Անդրանիկ Իսպիրյանը՝ անդրադառնալով հարցին, թե ռուս-թուրքական հարաբերություններն ինչ ազդեցություն ունեն Հարավային Կովկասի վրա:
«Արցախում մեզ համար ողբերգական իրադարձությունները ցույց տվեցին, որ Ռուսաստանն ուղղակի չկարողացավ շատ բանի հասնել: Ռուս խաղաղապահները մտան երկարաժամկետ հույսերով, սակայն ընթացքն այլ ձեւ դասավորվեց: Հիմա ավելին, եկել են այն օրին, որ ռուսներին ընդհանրապես տարածաշրջանից են փորձում հեռացնել, թուլացնել ազդեցությունը: Մենք տեսնում ենք, որ Ռուսաստանը որեւէ կերպ չի փորձում դեռեւս ինչ-որ լուծում գտնել, որն առանց պատերազմի կլինի:
Այսօր իրավիճակը շատ արագ է փոխվում, եւ այս առումով Անթալիայի ֆորումում հետաքրքիր էր եւ ոչ այնքան ոգեւերոիչ Լավրովի ելույթները, որոնք նախորդների համեմատ այնքան էլ գոտեպնդող չէին տարածաշրջանում Ռուսաստանի համար»,-ասաց նա:
Անդրանիկ Իսպիրյանը նկատեց, որ Անթալիայի ֆորումին Անկարայի հայտարարությունները կարծես միտված չէին Ադրբեջանի ռազմական գործողությունների աջակցմանը, եւ Եվրոպայի տված «դաբրոն» ուղղակի տրված էր, որպեսզի Հայաստանին վերցնեն իրենց ազդեցության տակ առանց պատերազմի: «Սակայն ինչպես ՀՀ վարչապետն է նշում, Ադրբեջանը վարում է այլ քաղաքականություն»,- ասաց նա:
