Ամերիկյան Ալաբամա նահանգի բնակչուհին, որը բեմադրել էր իր առևանգումը, կանգնել է դատարանի առաջ, հայտնում է AP-ն։

Նա մեղադրվում է ոստիկանություն սուտ հաղորդում տալու մեջ, թե իրեն առևանգել են անցյալ ամառ:

Կարլի Ռասելի երկօրյա անհետացման և առևանգման պատմությունը հայտնվել է երկրի ուշադրության կենտրոնում, նախքան ոստիկանությունն այն կեղծիք է անվանել:

Ռասելի դատավարությունը նշանակվել էր մարտի 18-ին, սակայն հինգշաբթի օրը ներկայացված դատական ​​փաստաթուղթը ցույց է տալիս, որ այժմ դատական ​​նիստը նշանակված է մարտի 21-ին: Փաստաթղթում չի նշվում, թե արդյո՞ք նա իրեն մեղավոր է ճանաչում:

Ռասելի փաստաբանները բողոքարկել էին նրա գործը շրջանային դատարանում այն բանից հետո, երբ քաղաքային դատավորը հոկտեմբերի որոշմամբ Ռասելին մեղավոր էր ճանաչել իրավապահներին սուտ հաղորդում տալու  և միջադեպի մասին կեղծ տեղեկություններ տարածելու մեջ:

Որոշումը կայացվել է այն բանից հետո, երբ ամբաստանյալի փաստաբանները համաձայնել են «խոսել և բողոքարկել», մի գործընթաց, որի ընթացքում ամբաստանյալն ընդունում է իր դեմ ներկայացված ապացույցները, կայացվում է մեղադրական դատավճիռ, և գործը հանձնվում է շրջանային դատարան:

Կինն անհետացել էր հուլիսի 13-ին այն բանից հետո, երբ զանգահարել էր 911 և հայտնել Բիրմինգհեմի Հուվեր արվարձանի միջնահանգային  ​​459 ավտոմայրուղու հատվածում գտնվող մանկան մասին։ Երկու օր անց նա տուն էր վերադարձել և ոստիկաններին հայտնել, որ իրեն առևանգել էին և ստիպողաբար մեքենա նստեցրել:

Ոստիկանությունն արագ կասկածի տակ է դրել  Ռասելի պատմությունը: Նրա փաստաբանը ոստիկանության միջոցով հայտարարություն է տարածել, որում խոստովանել է, որ առևանգում չի եղել, և որ կինը երբեք չի տեսել երեխային։ Ինքը՝ Ռասելը, ներողություն է խնդրել իրավապահ մարմիններից և իրեն որոնող կամավորներից։

Հուվերի ոստիկանապետ Նիք Դերզիսը հայտարարել է, որ հիասթափված է, որ Ռասելին միայն երկու զանցանք է առաջադրվել՝ չնայած նրա պատճառած խուճապին և անկարգություններին:

Ալաբամայի օրենսդիրներն այս տարի քննարկում են մի օրինագիծ, որը կխստացնի  հանցագործությունների մասին կեղծ հաղորդումների համար սահմանված պատիժը: