«Fly Arna» ավիաընկերության լիցենզիան դադարեցվել է ինքնաթիռներ չունենալու պատճառով։ Այս մասին Ազգային ժողովում, մարտի 19-ին պատասխանելով կառավարող «Քաղպայմանագիր» խմբակցության պատգամավոր Սիսակ Գաբիելյանի հարցին, ասել է տարածքային կառավարման եւ ենթակառուցվածքների փոխնախարար Արմեն Սիմոնյանը։
Փոխնախարարի խոսքով, եթե ավիաընկերությունն այս դեպքում օդանավեր չունի, նրա լիցենզիան դադարեցվում է 6 ամսով։ Իսկ եթե այդ ընթացքում ընկերությունը չկարողանա լուծել խնդիրը, լիցենզիան հետ կկանչվի։
Ի պատասխան խնդրի պատճառների մասին նշելու խնդրանքի՝ Սիմոնյանը հիշեցրել է, որ ընկերության հետ կապված են նաեւ այլ կազմակերպություններ, որոնք իրենց առեւտրային գաղտնիքն ունեն։
«Բայց հանրային տեղեկություն կտրամադրվի։ Հիմա կարող եմ միայն ասել, որ հարցն ուսումնասիրվում է, եւ որ այն, հիմնականում, ֆինանսական է»,- ասել է Սիմոնյանը։