Հայաստանի Հանրային հեռուստատեսությանը կտրամադրվի եւս մեկ լրացուցիչ սլոտ հանրային մուլտիպլեքսում։ Այս մասին Ազգային ժողովի նիստում, «Տեսալսողական մեդիաների մասին» օրենքում փոփոխություններ կատարելու մասին օրինագծի քննարկման ժամանակ մարտի 19-ին ասել է կառավարող «Քաղպայմանագիր» խմբակցության պատգամավոր, հանձնաժողովի նախագահ Սիսակ Գաբրիելյանը։
Նրա խոսքով, Հանրային հեռուստատեսությունը ներկա պահին ունի միայն մեկ լրատվական ալիք, որը հեռարձակվում է Երեւանի տարածքում։
«Փոփոխությունները թույլ կտան Հանրային հեռուստատեսությանը ստեղծել նոր հեռուստաալիք, որը կհեռարձակվի արդեն ամբողջ հանրապետության տարածքում»,-ասել է Գաբրիելյանը։
Ընդ որում՝ Հանրային հեռուստատեսության բյուջեն ավելացնել չի նախատեսվում։
Անցումային դրույթներում կամրագրվի. ալիքը, որը հեռարձակում է ապահովում մայրաքաղաքում, 30 օրվա ընթացքում կփոխարինվի ալիքով, որը կհեռարձակվի ամբողջ հանրապետությունում։ Խոսքը հանրային հեռարձակողի մասին է, որը կունենա համապատասխան լիցենզիա օրենքի ուժի մեջ մտնելու պահին։
