![](img/news/81/38/41/default.jpg)
Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտարարել է, որ Ուկրաինան կապ չունի մերձմոսկովյան «Crocus City Hall»-ում տեղի ունեցած ահաբեկչական հարձակման հետ, հայտնում է Strana.ua-ն։
«Ուկրաինան միանշանակ կապ չունի այս իրադարձությունների հետ»,- ասել է Պոդոլյակը։
Ուկրաինայի պաշտպանության նախարարության հետախուզության գլխավոր վարչության ներկայացուցիչ Անդրեյ Յուսովն էլ հայտարարել է, որ տեղի ունեցած ահաբեկչությունը «ռուսական հատուկ ծառայությունների սադրանքն է»։
ԱՄՆ Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին ավելի վաղ հայտարարել էր, որ ԱՄՆ-ը նախնական տեղեկատվություն չունի Մոսկվայում տեղի ունեցած ահաբեկչության մասին։
Հարցին՝ արդյոք Ուկրաինան կարող է կանգնած լինել տեղի ունեցած հարձակման հետևում, Սպիտակ տան ներկայացուցիչն ասել է, որ այս պահին որևէ ապացույց չկա, որ Ուկրաինան կամ ուկրաինացիները որևէ կերպ կապ ունեն ահաբեկչության հետ։
Ռուսաստանի իշխանությունները դեռ չեն հայտարարել, թե ով է պատասխանատվություն կտրում տեղի ունեցած ահաբեկչության համար։
Ավելի վաղ հաղորդվել էր, որ անհայտ երեք անձ ներխուժել է համերգասրահ և կրակ բացել մարդկանց ուղղությամբ։ Շենքում պայթյուն է տեղի ունեցել և հրդեհ բռնկվել։ Ահաբեկչության հետևանքով զոհվել է առնվազն 40, վիրավորվել՝ ավելի քան 100 մարդ։ ՌԴ Քննչական կոմիտեն քրեական գործ է հարուցել «Ահաբեկչական գործողություն» հոդվածով։