Թուրքիայի նախագահ Ռեջեփ Թայիփ Էրդողանը խոստովանել է, որ իր կուսակցությունը կիրակի տեղի ունեցած տեղական ընտրություններում պարտություն է կրել, տեղեկացրել է «Ալ-Արաբիա» հեռուստաալիքը։
«Թուրքիայի նախագահ Ռեջեփ Թայիփ Էրդողանը կիրակի խոստովանել է, որ կիրակնօրյա տեղական ընտրությունների արդյունքները «շրջադարձային պահ» են դարձել իր կուսակցության համար, բայց խոստացել է «հարգել ազգի որոշումը»,- նշվել է հաղորդագրությունում։
«Ցավոք, մենք ցանկալի արդյունքների չհասանք»,- ասել է նա՝ ելույթ ունենալով «Արդարություն եւ զարգացում» կուսակցության (ԱԶԿ) կենտրոնատեղիում։
Նախագահն ավելացրել է. «Մենք, իհարկե, կհարգենք ազգի որոշումը, մենք չենք համառի, չենք գործի ազգային կամքի դեմ եւ կասկածի չենք ենթարկի ազգի ուժը»։
Ընդդիմադիր Հանրապետական ժողովրդական կուսակցությունը (ՀԺԿ) հայտարարել է, որ ընտրություններում պահել է դիրքերը Ստամբուլում եւ Անկարայում եւ կարողացել է հասնել հաջողության այլ քաղաքներում, որոնք սովորաբար պատկանել են ԱԶԿ-ին։
Անկարայում ստուգվել է ընտրաթերթիկների 50 տոկոսը։ Ներկա քաղաքապետ Մանսուլ Յավաշը ՀԺԿ-ից հավաքել է ձայների 58,8 տոկոսը, ԱԶԿ թեկնածու Թուրգութ Ալթինոքը՝ 33,3 տոկոս։
Յավաշն արդեն ասել է կողմնակիցներին. «Ընտրություններն ավարտված են, մենք կշարունակենք ծառայել Անկարային»։
Ստամբուլի գործող քաղաքապետ Էքրեմ Իմամօղլուն (ՀԺԿ) շարունակում է առաջատար դիրք գրավել քաղաքային վարչության ղեկավարի ընտրություններում։ Ընտրաթերթիկների 71 տոկոսի ստուգումից հետո Իմամօղլուն հավաքել է ձայների 50,4 տոկոսը, ԱԶԿ թեկնածու Մուրատ Քուրումուն՝ 40,9 տոկոս։
Ըստ նախնական տվյալների՝ ՀԺԿ-ն ամբողջ երկրում առաջատարն է՝ հավաքելով մոտ 39 տոկոս ձայն, ինչն առաջին արդյունքն է վերջին 35 տարիների ընթացքում, նշել են ԶԼՄ-ները։ «Անադոլու» գործակալությունը հրապարակել է մասնակի պաշտոնական արդյունքներ, որոնք վկայում են այն մասին, որ ՀԺԿ-ն հաղթում է այնպիսի խոշոր քաղաքներում, ինչպիսին են Իզմիրը, Բուրսան, Անթալիան եւ Ադանան։
Ավելի քան երկու տասնամյակ Թուրքիայում գերակշռել է նախագահ Էրդողանի ԱԶԿ-ն։
