Թուրքական Aydınlık թերթը հայտնել է իշխանությունների դեմ հնարավոր դավադրությանը իրավապահ որոշ մարմիններում ամերիկյան կողմնորոշում ունեցող աղանդների մասնակցության մասին։
«Սերդար Սերթչելիքը, որին դատում են այն բանի համար, որ նա իբր հանցավոր կազմակերպության (Բորա Կապլան) «թիվ 2»-ն է, վերջերս հայտնել է, որ այս գործով գաղտնի վկա է։ Սերթչելիքը հայտնել է, որ ոստիկանությունը ստիպել է իրեն նշել կառավարող կուսակցության (Ak Parti) որոշ ղեկավարների անուններ։ Նրա հայտարարություններից հետո ձերբակալվել են ոստիկանության պետեր, որոնք ազատվել են աշխատանքից։ Ազգային հետախուզական կազմակերպությունը եւ անվտանգության ուժերը պարզել են, որ նրանք ղեկավարել են նախագահ Թայիփ Էրդողանի դեմ ուղղված դավադրությունը։ Դավադրությանը մասնակցում են ամերիկյան կողմնորոշում ունեցող աղանդները»,- գրել է պարբերականը։
«Անկարայի անվտանգության վարչության որոշ բարձրաստիճան պաշտոնյաների մասնակցությամբ FETÖ-ի (Թուրքիայում արգելված կազմակերություն, որը մեղադրվում է 2016թ. պետական հեղաշրջման մեջ) անդամները աշխատում են դավադրություն կազմակերպելու ուղղությամբ»,- գրել է թերթը։
Մինչ այդ Էրդողանը շտապ նիստ էր անցկացրել հետախուզության եւ արդարադատության նախարարության ղեկավարների հետ հեղաշրջման մասին նախազգուշացուից հետո։ ՆԳՆ ղեկավար Ալի Երլիքայան հայտնել է իշխանությունների եւ ժողովրդի դեմ աշխատող կառույցներին պարզելու մտադրության մասին։ Երկրում մինչ այդ ազատվել եւ ձերբակալվել էին ոստիկանության աշխատակիցներ Անկարայի անվտանգության վարչությունում՝ հանցավոր կազմակերպության հետ կապեր ունենալու մեղադրանքով։
Պետական հեղաշրջման փորձը Թուրքիայում տեղի է ունեցել 2016թ. հուլիսին։ Իշխանությունները մեղադրում են ԱՄՆ-ում ապրող Ֆեթուլա Գյուլենին ու նրա կազմակերպությանը, որն անվանում են FETÖ (ֆեթուլայականների ահաբեկչական կազմակերպություն)։ Այն ժամանակ ձերբակալել էին ավելի քան 80 հազար մարդու, աշխատանքից ազատել կամ հեռացրել մոտ 150 պետծառայողների, այդ թվում զինվորականների։ Գյուլենն ինքը դատապարտել է հեղաշրջման փորձը եւ հերքել մեղադրանքները։
