Գրիպի համաճարակի պատճառով նախագահական ընտրություններն Ուկրաինայում հունվարի 17-ից կարող են հետաձգվել մինչեւ հաջորդ տարվա մայիսի 30-ը։ Այս մասին «Ընտրությունները տանում են „խոզային“ սցենարի» հեղինակային հոդվածում նոյեմբերի 6-ին հայտարարել է նախագահի քարտուղարության ղեկավարի տեղակալ Իգոր Պոպովը,- հայտնում է УНИАН գործակալությունը։

«Եթե կառավարությանը չհաջողվի վերահսկողության տակ պահել գրիպի համաճարակը, ապա բացառված չէ, որ երկրում արտակարգ իրավիճակ հայտարարվի եւ ընտրությունները տեղափոխվեն մայիսի 30-ին»,- հայտարարել է Պոպովը, ում կարծիքով համաճարակը հիմնավորապես ազդել է նախընտրական քարոզարշավի վրա։

Նրա խոսքով, «Կարանտինի ռեժիմը վնասում է նախագահի ընդդիմադիր թկնածուներին, քանի որ իշխանական թեկնածուները կարող են այցելել կարանտինային շրջաններ, հանդիպել ընտրողների, մամուլի հետ, իսկ մյուս թեկնածուները՝ ոչ»։

Բացի այդ, նա նշել է, որ երկու ամիս տեւած արտակարգ իրավիճակի պարագայում ընտրությունների նոր օր կարող է դառնալ մայիսի 30-ը։

Հիշեցնենք, որ Ուկաինայի Առողջապահության նախարարության վերջին տվյալներով այդ երկրում գրիպի տարբեր ձեւերից մահացել է 109 մարդ։