Իսպանիայի վարչապետ Պեդրո Սանչեսը հավաստիացրել է, որ թագավորությունը պատրաստ է ճանաչել Պաղեստինը որպես պետություն, եւ դա համապատասխանում է Եվրոպայի աշխարհաքաղաքական շահերին։
Ելույթ ունենալով պատգամավորների Կոնգրեսում (խորհրդարանի ստորին պալատ)՝ վարչապետը նշել է, որ «Իսրայելի կառավարության լրիվ անհամամասնական պատասխանը ՀԱՄԱՍ-ի ահաբեկչական գրոհին չեղարկում է հումանիտար իրավունքի տասնամյակները եւ սպառնում ապակայունացնել Մերձավոր Արեւելքը եւ, հետեւաբար, ամբողջ աշխարհը»։
«Իսպանիան պատրաստ է ճանաչել Պաղեստինը,- ասել է Սանչեսը։- Դա արդարացի է, դա է պահանջում սոցիալական մեծամասնությունը, եւ հանուն Եվրոպայի աշխարհաքաղաքական շահերի»։
Իրավիճակը Մերձավոր Արեւելքում սրվել է 2023թ. հոկտեմբերի 7-ին Գազայի հատվածից իսրայելական տարածք ՀԱՄԱՍ պաղեստինյան արմատական շարժման զինյալների ներթափանցումից հետո, որն ուղեկցվել է սահմանամերձ բնակավայրերի բնակիչների սպանություններով եւ պատանդառմամբ։ Ի պատասխան՝ Իսրայելը հայտարարել է Գազայի լիակատար շրջափակման մասին եւ սկսել հարվածներ հասցնել Գազայի հատվածին ու Լիբանանի եւ Սիրիայի որոշ շրջանների, ինչից հետո սկսեց ցամաքային գործողությունն անկլավում։ Բախումներ են տեղի ունենում նաեւ Հորդանան գետի Արեւմտյան ափին։
