Իրանի պատասխանը Իսրայելին խորհրդանշական բնույթ էր կրում: Այս մասին NEWS.am-ի հետ զրույցում նշեց տարածաշրջանային հարցերով փորձագետ Արմեն Պետրոսյանը:
«Իրանը չէր ցանկանում հրահրել մեծ տարածաշրջանային պատերազմ: Այն գործողությունը, որ եղավ Իսրայելի դեմ, դա Իրանի այս պահին եղած քաղաքական ու ռազմական հնարավորությունների առավելագույնն էր: Իրանը 2022-ից հատկապես, դիմագրվում է իրեն մեծ պատերազմի մեջ ներքաշելու շատ լուրջ միջազգային սադրանքների: Իրանի ռազմավարությունը այն է, որ թույլ չտա իրեն ներքաշել մեծ պատերազմի մեջ, որը կարող է կործանարար հետեւանքներ ունենալ այդ պետության վարչակարգի ու պետության համար»,-ասաց նա:
Արմեն Պետրոսյանի խոսքով, Իրանը մանրամասն հաշվել էր իր գործողության հնարավոր հետեւանքները. «Նրանք հաշվարկել էին այնպես, որ իրենց գործողությունը չունենա հետադարձ ազդեցություն եւ վերածվի պատերազմի: Դրանով էր պայմանավորված, որ նախ նախազգուշացնում էին բոլորին, որ տեղի է ունենալու գործողություն: ԱՄՆ-ին հասցվել էր այն ձեւաչափը, որով տեղի է ունենալու հարձակումը եւ ակնկալվում էր, որ եթե Իսրայելը չպատասխանի, թեման կարելի է փակված համարել»: