Պետք է միանշանակ սպասել, որ Իսրայելը պատասխանելու է Իրանին: Այս մասին NEWS.am-ի հետ զրույցում նշեց տարածաշրջանային հարցերով փորձագետ Արմեն Պետրոսյանը:
«Ասեմ ավելին, Իսրայելը փորձել է միանգամից պատասխանել եւ միայն Բայդենի անձամբ միջամտության արդյունքում այդ պատասխանը տեղի չի ունեցել: Հենց եղավ տեղեկատվությունը, որ Իրանն սկսել է իր պատժիչ գործողությունը, Իսրայելը պատրաստվել էր դրան եւ անմիջապես փորձում էին նախաձեռնել պատասխան գործողությունը, բայց ԱՄՆ-ի գործուն միջամտության արդյունքում դա տեղի չունեցավ: Այս պահին ԱՄՆ-ի ամբողջ ջանքերն ուղղված են թույլ չտալու էսլակացիա:
Այս պահին առաջինը Իսրայելին է հարկավոր նման հակամարտություն, որ նրանք այս փոփոխվող աշխարհակարգի ժամանակահատվածն օգտագործեն իրենց համար ռազմավարական խնդիրներ լուծելու համար: Մասնավորապես, Գազայի խնդիրը լուծել են, Սիրիայից տարածքային հավակնություններն առարկայացնելու առումով:
Ես կարծում եմ, որ ինչ-ր գործողություն կարող է իրականացվել այն ռազմաբազաների կամ այն տեղանքի նկատմամբ, որտեղից տեղի է ունեցել հարձակումն Իսրայելի դեմ»,-ասաց նա:
Արմեն Պետրոսյանը նկատեց, որ Ադրբեջանը կարող է դիտարկվել որպես պլացդարմ Իրանի դեմ գործողությունների համար. «Բայց դա կարող է լինել այն դեպքում, եթե Ադրբեջանը տեսնի այդ հակամարտությունից իր սեփական օգուտը քաղելու հնարավորություն: Չնայած չի բացառվում, որ Իսրայելն ինքնագլուխ գործի Ադրբեջանի տարածքում, որովհետեւ ունի ներկայություն եւ ռեսուրսներ»:
