ԵՄ դիվանագիտության ղեկավար Ժոզեպ Բորելը հայտարարել է, որ ԵՄ-ն նախապես գիտեր Իսրայելին Իրանի պատասխան հարվածի մասին այն բանից հետո, երբ իսրայելական բանակը գնդակոծեց Դամասկոսում Իրանի հյուպատոսությունը։ Այս մասին նա ասել է Le Monde-ին տված հարցազրույցում։
«Մեզ նախազգուշացրել էին (Իրանի պատասխան հարձակումից) մի քանի օր առաջ»,- ասել է Բորելը։ Սակայն, չի մանրամասնել, թե կոնկրետ որտեղից է ստացել այդ տեղեկությունը։
Եվրոպական դիվանագիտության ղեկավարի խոսքով, ԵՄ քաղաքական նպատակը Մերձավոր Արևելքում հակամարտության սրումից խուսափելն է։ «Դա նման է շախմատի, որտեղ բոլորն առաջ են տանում իրենց խաղաքարերը», - ասել է Բորելը:
Նա նաև հավելել է, որ ապրիլի սկզբին ԵՄ ներկայացուցիչները Դամասկոսում հյուպատոսության վրա հարձակումից հետո Թեհրանին փոխանցեցին, որ տարածաշրջանի ոչ մի երկիր շահագրգռված չէ ռազմական հակամարտության ընդլայնմամբ, «որովհետև դա կնշանակի, որ պատերազմը կշարունակվի»:
Ավելի վաղ Իրանի փոխարտգործնախարար Ալի Բաղերի Քանին ասել էր, որ Իրանը վայրկյանների ընթացքում կպատասխանի, եթե Իսրայելը փորձի հարձակվել Իսլամական Հանրապետության վրա, և այդ պատասխանը շատ ավելի ուժեղ կլինի, քան նախորդը։
Ապրիլի լույս 14-ի գիշերը Իրանը հարձակվեց Իսրայելի վրա՝ ի պատասխան ապրիլի 1-ին Սիրիայի Դամասկոսում Իրանի հյուպատոսության վրա Իսրայելի հարձակման։ Իսրայելի իշխանությունները Թեհրանից պատրաստվում էին լայնածավալ հարձակման։ Հինգ ժամ տևած հարձակման ընթացքում Իսլամական Հանրապետությունը Իսրայելի ուղղությամբ արձակել է 185 անօդաչու թռչող սարք, 30 թևավոր հրթիռ և 120 բալիստիկ հրթիռ, ասել է Իսրայելի պաշտպանության բանակի խոսնակ Դանիել Հագարին։
