Լեռնային Ղարաբաղի առողջապահության նախարարությունում կայացած խորհրդակցությունը նվիրված է եղել «խոզի գրիպ»-ի կանխարգելմանը:
Հանրապետությունում «խոզագրիպ»-ով վարակման դեպքեր չեն արձանագրվել: Սակայն ԼՂՀ առողջապահության նախարար Արմեն Խաչատրյանի խոսքերով, անհրաժեշտ է պատրաստ լինել ցանկացած վտանգի, սերտորեն համագործակցել այդ ուղղությամբ՝ միջգերատեսչական մակարդակով:
Առողջապահության նախարարությունը համապատասխան մեթոդական պաստառներ է հատկացնելու գերատեսչություններին եւ հաստատություններին, դպրոցներին, մանկապարտեզներին, եւ այլ հիմնարկների: Բժիշկներն ու մասնագետները տեղերում լուսավորչական-կանխարգելիչ սեմինարներ են անցկացնելու: Ուսումնական հաստատություններում բացատրական աշխատանքներ են տարվելու: Հատուկ ուշադրություն է դարձվելու մանկապարտեզներին, քանի որ երեխաներն ամենախոցելի խմբերից են:
«ԼՂՀ առողջապահության նախարարության հակահամաճարակային ծառայության մասնագետներն ամենօրյա կապ են պահպանում Հայաստանի համապատասխան ծառայության հետ, այնտեղից մենք տեղեկություններ ենք ստանում այն անձանց մասին, որոնք այցելում են Լեռնային Ղարաբաղ, պոլիկլինիկաների կողմից համապատասխան դիտարկում է անցկացվում: Սակայն մարդիկ պետք է հասկանան, որ դա ոչ միայն նախարարության, այլեւ ողջ հանրության գործն է, եւ ամեն մարդ պետք է գիտակցի, որ դա իր անվտանգության հարցն է»,- նշել է Արմեն Խաչատրյանը:
Վարակը դիմագրավելու համար ԼՂՀ կառավարությունը պահուստային ֆոնդից հատկացրել է 4,5 մլն դրամ:
