Ես որեւէ շարժման հետ կապված մտավախություն չունեմ: Այս մասին, այսօր՝ մայիսի 9-ին, «Հաղթանակ» զբոսայգում լրագրողների հետ զրույցում նշեց ԱԺ ՔՊ խմբակցության պատգամավոր Բաբկեն Թունյանը՝ անդրադառնալով դիտարկմանը, թե մտավախություն չունի, որ Բագրատ Սրբազանի գլխավորած շարժումը կարող է մեծ թափ հավաքել եւ իշխանափոխության հանգեցնել:
«Ես որքան հիշում եմ, իրենք հայտարարել են, որ իրենք իշխանափոխության պահանջ չունեն այս պահին: Եկեք ժամանակից առաջ չընկնենք, թող հավաքը անեն, հասկանանք՝ իրենց պահանջն ինչ է, հետո կորոշենք:
Իսկ Հայաստանում իշխանության փոփոխություն լինելու է ընտրությունների միջոցով: Երբ ժողովուրդը կորոշի, որ հաջորդ ընտրությունների ժամանակ գործող իշխանությանը ձայն չի տա, այդ ժամանակ իշխանությունը կփոխվի»,-ասաց նա:
Նշենք, որ այսօր ժամը 4-ին Երեւանի Հանրապետության հրապարակում նախատեսված է Բագրատ Սրբազանի գլխավորած շարժման հանրահավաքը: