Տավուշի մարզի Կիրանց գյուղում կան բնակիչներ, որոնք աննախադեպ ճնշման պայմաններում պատրաստ են փոխհատուցում ստանալ։ Այս մասին Ազգային ժողովում, ավանդական ճեպազրույցներում, մայիսի 23-ին ասել է «Հայաստան» ընդդիմադիր խմբակցության պատգամավոր Գառնիկ Դանիելյանը։
«Այս օրերին Կիրանցի մեր հայրենակիցները ենթարկվում են աննախադեպ ճնշման։ Նրանց ասում են, որ ելք չկա, եւ որ ամենաճիշտ որոշումը կառավարության առաջարկած փոխհատուցումն ընդունելն է։ Հայտարարությունները, որ կադաստրի հավաստագրերի հարցում խնդիրներ կան, պատահական չեն։ Դրանք իբր ձեւակերպվել են ոչ ճիշտ։ Այս օրերին մարդկանց ասում են, թե իբր, «եթե հանգիստ չընդունեք այս առաջարկները հիմա, վաղը ուշ կլինի»,- ասել է Դանիելյանը։
Պատգամավորի խոսքով՝ իշխանությունները նորից ցանկանում են վախեցնել մարդկանց։ Նա նշել է, որ Կիրանցի յուրաքանչյուր բնակչին բաժին է ընկնում 10-15 պաշտոնյա, որոնք նրանց սպառնում են եւ ճնշում գործադրում։ Ընդ որում՝ ամենօրյա ռեժիմով։
