Հայաստանի եվրոինտեգրմանն այլընտրանք չկա: Այդպես կարծում է Հայաստանի ԱԳն նախկին ղեկավար Վարդան Օսկանյանը: Իր կարծիքը նա հայտնել է «Եվրոպական հեռանկար. Համոզմո՞ւնք, թե՞ պատրանք» քննարկմանը՝ կազմակերպված «Սիվիլիթաս» հիմնադրամի կողմից, որի ղեկավարն էլ հենց նախկին պաշտոնյան է:
Օսկանյանի խոսքերով, Երեւանի նպատակը չպետք է լինի ԵՄ-ին անդամակցելը, այլ փորձել այդ գործըթնացից առավելագույն հնարավորը ստանալ: Միեւնույն ժամանակ նա մատնանշեց այն հանգամանքը, որ գործընթացը դատապարտված է ձախողման, եթե չլինի եռամիասնության՝ Եվրոպա-հայ հանրություն-իշխանություն համագործակցված աշխատանքը: Օսկանյանը նկատեց, որ հաճախ երկրի իշխանությունն անհրաժեշտ է համարում այս կամ այն եվրոպական արժեքի կրողը լինել միայն նրա համար, որ չեզոքացնի իր համար առկա վտանգները: Խոսելով այն մասին, որ եվրոպական նորմերը Հայաստանում չեն գործում, Օսկանյանը նշեց, որ դրա պատճառը խորհրդային անցյալն է, որ հետքը դեռ չի անհետացել: «Եվրոպական արժեքներն ընդունել՝ չի նշանակում ամիսը երկու-երեք անգամ այցելել Բրյուսել կամ որեւէ այլ քաղաք»,- նշեց նա: