Խոզի գրիպով վարակված վերջին 4 հիվանդները մեկ ընտանիքից են։ Այս մասին NEWS.am-ի թղթակցին հայտնեց առողջապահության նախարարի օգնական Շուշան Հունանյանը։
Նրա խոսքով, ընտանիքի անդամներից մեկը օրերս է ժամանանել Օմսկից, եւ երեք օր անց նա եւ ընտանիքի երեք անդամներ գրիպի վարակի կասկածով դիմել են հիվանդանոց։ Լաբարատոր հետազոտությունների արդյունքում պարզվել է, որ նրանք բոլորը վարակված են A\H1N1 վիրուսով։
Խոզի գրիպով վարակով մյուս անձնավորությյունը եղել է տաքսու վարորդ, ով սպասարկել է «Զվարթնոց» օդակայնի ուղեւորներին։
Ժամը 17:00-ի տվյալներով, Հայաստանում հայտնաբերվել է ընդհանուր հաշվով խոզի գրիպով վարակվածության 11 դեպք։ Հիվանդներից 3-ը արդեն դուրս են գրվել, մնացածների վիճակը մտահոգություններ չի առաջացնում։ 11 հիվանդներից 2-ը Իրանի քաղաքացիներ են, 1-ը Թուրքիայի, իսկ մնացածները Հայաստանի Հանրապետության քաղաքացիներ։
Նշենք, որ ներկայումս Հայաստանում դեռեւս չկա խոզի գրիպի դեմ պատվաստանյութ ոչ երեխաների եւ ոչ էլ մեծերի համար։ Հանրապետությունում կա միայն «Տամիֆլյու» դեղի որոշակի չափաքանակ։ Քաղաքի խանութներում էլ բժշկական դիմակների պակաս կա։