Հայ-թուրքական հարաբերությունների կարգավորման ընթացքը եւ Հայաստան-Եվրամիություն փոխգործակցության հարցեր են քննարկվել Հայաստանի Ազգային անվտանգության խորհրդի քարտուղար Արթուր Բաղդասարյանի եւ Հայաստանում Գերմանիայի Դաշնային Հանրապետության նորանշանակ դեսպան Հանս-Յոխեն Շմիդթի՝ նոյեմբերի 16-ին կայացած հանդիպմանը:
Ազգային անվտանգության խորհրդի քարտուղարի մամուլի գրասենյակից NEWS.am-ն հայտնում են, որ կողմերը քննարկել են նաեւ հայ-գերմանական երկկողմ հարաբերություններին վերաբերող հարցեր: Արթուր Բաղդասարյանը բարձր է գնահատել Գերմանիայի ներգրավվածությունը Հայաստանում տարբեր ծրագրերի իրականացման գործում: Անդրադարձ է եղել նաեւ Հայաստանի` միջազգային կառույցների հետ համագործակցության խնդիրներին, մասնավորապես` Հայաստան-Եվրամիություն համագործակցության ծրագրին:
Դեսպանի խնդրանքով Արթուր Բաղդասարյանը ներկայացրել է հայ-թուրքական հարաբերությունների կարգավորման ընթացքը: