«Արցախի եվրոպական կենտրոն» եւ «Ցեղասպանության ճանաչման հանձնախումբ» գերմանական հասարակական կազմակերպությունները, Բեռլինի երկու հայկական համայնքների հետ միասին, «Սա չպետք է կրկնվի» կարգախոսով ցույց են կազմակերպել Բեռլինում`ի հիշատակ 1988թ. Սումգայիթում եւ ադրբեջանական այլ քաղաքներում տեղի ունեցած ջարդերի զոհերի:
Ցույցից հետո սգո միջոցառումը շարունակվել է Բեռլինի Սուրբ Լուիզ եկեղեցում, որի ժամանակ ելույթ է ունեցել ԳԴՀ-ում ԼՂՀ մշտական ներկայացուցիչ Հարություն Գրիգորյանը:Ադրբեջանում հայ բնակչության ջարդերի, ղարաբաղյան հակամարտության մասին վերլուծական զեկույցներով հանդես են եկել դոկտոր Թեսսա Հոֆմանը եւ «Հայ-գերմանական նամակագրություն» տեղեկատվական հանդեսի գլխավոր խմբագիր, հրապարակախոս Րաֆֆի Կանտյանը: Եզրափակիչ խոսքով երեկոն ավարտել է ԳԴՀ-ում ՀՀ դեսպան Արմեն Մարտիրոսյանը:
Անմեղ զոհերի հիշատակին մատուցվել է նաեւ պատարագ` Գերմանիայի թեմի առաջնորդ Գարեգին եպիսկոպոս Բեկչյանի կողմից:
Լուսանկարները՝ Վարուժան Բաբախանեանից
