Առողջապահության համաշխարհային կազմակերպության (ԱՀԿ) տվյալներով, անցած շաբաթ «խոզի գրիպի» պատճառով մահվան ավելի քան 1000 դեպք է գրանցվել: Նշենք, որ ապրիլից մինչ այժմ արձանագրվել է H1N1 վիրուսից մահվան 7,800 դեպք, որոնց ճնշող մեծամասնությունը` 5,360 դեպք, Հարավային եւ Հյուսիսային Ամերիկաներում է գրանցվել:
Այդուհանդերձ, ԱՀԿ-ի տվյալները վկայում են այն մասին, որ վերջին շրջանում աճել է զոհերի թիվը՝ հատկապես Եվրոպայում, ուր անցած շաբաթվա ընթացքում «խոզի գրիպին» զոհ է գնացել առնվազն 650 մարդ: H1N1 վիրուսի առավել մեծ ակտիվություն է նկատվել Մոլդովայում: Համաճարակի ակտիվությունը պակասել է Բելառուսում, Սերբիայում եւ Ուկրաինայում:
Հիշեցնենք, որ անցած շաբաթ «խոզի գրիպի» մահվան կասկածանքով առաջին դեպքն է արձանագրվել նաեւ Հայաստանում: Նոյեմբերի 24-ի դրությամբ Հայաստանում արձանագրվել է H1N1 գրիպով կասկածելի 25 հիվանդ:
Հիվանդներից 22-ը բուժում ստանալուց հետո առողջացել եւ հիվանդանոցից դուրս են գրվել, իսկ մնացածները շարունակում են ստանալ համապատասխան բուժում «Նորք» ինֆեկցիոն հիվանդանոցում: