Մոսկվայի Կաչալովյան շուկայի հրդեհի վայրում եւս երկու այրված մարմիններ են գտել. այսպիսով զոհերի թիվը հասել է 17-ի:
Ներկայումս դեպքի վայրի զննությունն ավարտվել է հաղորդում է «Ինտերֆաքսը»:
Հիշեցնենք, ավելի վաղ հաղորդվել էր 15 զոհերի մասին: Հաղորդվել էր նաեւ, որ բոլոր զոհվածները Տաջիկստանի քաղաքացիներ են եղել: Հրշեջների տվյալներով` նրանց գիշերային կացարանը այնպես է կառուցված եղել, որ փրկվելու ոչ մի հնարավորություն չի եղել:
LifeNews-ի տվյալներով, աշխատողները հայտնվել են թակարդում. մարդիկ չեն կարողացել մոտենալ դռանը կրակե պատի պատճառով, իսկ պատուհաններից դուրս գալու համար խանգարել են ճաղավանդակները: Եւ մարդիկ ողջ-ողջ այրվել են:
«Զոհվածների ինքնությունը պարզել առայժմ չի հաջողվում, քանի որ ներսում ամեն ինչ այրվել է: Մարմիններն այնքան են այրվել, որ անգամ հնարավոր չէ պարզել զոհերի սեռը: Այժմ հաստատ տեղեկատվություն կա, որ զոհերի թվում երեխաներ չկան», - պատմել են հրշեջները:
Հրդեհը բռնկվել է առավոտյան ժամը 04.50-ին: Ժամը 07.05-ին հրդեհը մարվել է: Դրա մակերեսը կազմել է 50 քմ: