«Հայ-վրացական հարաբերությունները, միշտ, եւ հատկապես վերջին շրջանում, կառուցված են եղել անհավասարաչափության եւ անհամաչափության սկզբունքների վրա»,- դեկտեմբերի 4-ին լրագրողների հետ հանդիպման ժամանակ նշել է «Ջավախք» հայրենակցական միության նախագահ, ԱԺ պատգամավոր Շիրակ Թորոսյանը։
Նշելով, որ վրացական իշխանությունները միշտ էլ խտրական քաղաքականություն են կիրառել ջավախահայության հանդեպ՝ նա, սակայն, համոզմունք հայտնեց, որ հայ-թուրքական հարաբերությունների կարգավորմամբ իրավիճակն էապես կփոխվի: «Երբ հայ-թուրքական սահմանի բացումից հետո Հայաստանն այլընտրանքային ճանապարհ ունենա դեպի արտաքին աշխարհ, կկարողանա առավել կոշտ դիրքորոշում ցուցաբերել վրացական իշխանությունների հանդեպ՝ պահանջելով ջավախահայերի վիճակի բարելավում»,- համոզմունք հայտնեց նա՝ ավելացնելով, որ «Ջավախքի պայքարն անջատողականության պայքար չէ, այլ միայն՝ իրավունքների վերականգնման պայքար»:
Անդրադառնալով ռուս-վրացական հակամարտության արդյունքում 2006թ.-ից փակված Վերին Լարսի անցակետի թեմային՝ Շիրակ Թորոսյանը նկատեց, որ վրացական կողմը, զգալով հայ-թուրքական սահմանի մոտալուտ բացման հնարավորությունը, «արդեն իսկ զիջումների է գնում»: «Վրացական կողմը լավ է գիտակցում, որ հայ-թուրքական սահմանի բացման դեպքում Բաթումիի եւ Փոթիի նավահանգիստների դերն էականորեն կնվազի եւ կանի ամեն բան, որպեսզի չզրկի իրեն հայկական կողմից ստացվող հավելյալ եկամուտներից»:
ԱԺ պատգամավորի համոզմամբ, Վրաստանի եւ Հայաստանի միջեւ իրական գործընկերային հարբերություններ կծավալվեն միայն հայ-թուրքական սահմանի բացման պարագայում, երբ «Վրաստանը կդադարի իր աշխարհաքաղաքական դիրքի չարաշահումը եւ Հայաստանի հետ կսկսի հանդես գալ իրական գործընկերոջ դիրքերից»:
«Իսկ ընդհանրապես, դատելով ամենից՝ Վերին Լարսի անցակետը կբացվի մոտ ապագայում»,- եզրափակեց Շիրակ Թորոսյանը:
