նախընտրելի դարձնելԱդրբեջանի փոխվարչապետ, Միջազգային մարդասիրական օգնության հանրապետական հանձնաժողովի նախագահ Ալի Հասանովն ընդունել է Ադրբեջանում ՄԱԿ-ի փախստականների հարցերի գերագույն հանձնակատարի ներկայացուցչության ղեկավար Դագ Սիգուրդսոնին:
ԱՊԱ գործակալությունը, վկայակոչելով Փախստականների եւ հարկադիր տեղահանվածների հարցերի պետական հանձնաժողովի մամուլի ծառայությանը, տեղեկացնում է, որ քննարկված հարցերի թվում է եղել նաեւ Լեռնային Ղարաբաղում ադրբեջանական դիվերսիոն-հետախուզական խմբի անդամների ձերբակալումը:
Ադրբեջանցի պաշտոնյան մտահոգություն է արտահայտել եւ միջազգային կառույցների օգնությունը պահանջել:
Հիշեցնենք, որ ավելի վաղ ԼՂՀ ոստիկանությունը տարածել էր, որ Ադրբեջանի քաղաքացիներ Շահբազ Գուլիեւը (1968թ. ծնված), Դիլհամ Ասկերովը (1960թ. ծնված), ինչպես նաեւ սպանված երրորդ մասնակից Հասան Հասանովը, ունենալով զենք եւ զինամթերք, 2014թ. հունիսի 29-ին ապօրինաբար հատել էին ԼՂՀ պետական սահմանը եւ ներխուժել Հանրապետության Շահումյանի շրջանի տարածք՝ հետախուզական գործողությունների նպատակով: Տվյալ անձինք հատուկ առաջադրանքոց տեղեկություններ էին հավաքել եւ լրտեսական գործունեություն իրականացրել: Ավելին, նրանք զենքի գործադրմամբ հուլիսի 4-ին առեւանգել էին ԼՂՀ անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ եւ Մանաշիդ համայնքների միջեւ ընկած անտառային զանգվածում:
Բացի այդ, Հասանովը հուլիսի 11-ի երեկոյան Վարդենիս-Քարվաճառ ճանապարհի 32-րդ կմ-ին ազգային ատելության հողի վրա հրազենով սպանել էր Երեւանի բնակիչ Սարգիս Աբրահամյանին (1971թ. ծնված), իսկ Կոտայքի մարզի Ձորաղբյուր գյուղի բնակիչ Կարինե Դավթյանին հրազենային վնասվածքներ էր հասցրել: Նա զինված դիմադրություն էր ցույց տվել ձերբակալման ժամանակ եւ վնասազերծվել: Շահբազ Գուլիեւն ու Դիլհամ Ասկերովը ձերբակալված են:
