Այս պահին ՄԱԿ-ի Մարդու իրավունքների խորհրդի Համընդհանուր պարբերական դիտարկման (ՀՊԴ) աշխատանքային խումբը քննարկում է Հայաստանում մարդու իրավունքների իրավիճակը:

Հայաստանը մեկն է 14 պետություններից, որոնք ՀՊԴ աշխատանքային խմբի կողմից կդիտարկվեն հունվարի 19-ից մինչեւ 30-ը տեղի ունենալիք առաջիկա նստաշրջանի ընթացքում: Հայաստանի առաջին Համընդհանուր պարբերական դիտարկումը տեղի է ունեցել 2010 թ. մայիսի 6-ին:

Դիտարկումը տեղի է ունենում հետեւյալ փաստաթղթերի հիման վրա. 1) ազգային զեկույց. վերանայման շրջանակներում Պետության կողմից ներկայացված տեղեկություններ, 2) մարդու իրավունքների ոլորտի անկախ փորձագետների եւ խմբերի, մարդու իրավունքների պայմանագրային մարմինների եւ ՄԱԿ-ի այլ մարմինների զեկույցներում ներառված տեղեկություններ, 3) այլ շահագրգիռ կողմերի, այդ թվում մարդու իրավունքների ազգային հաստատությունների, տարածաշրջանային կազմակերպությունների եւ քաղաքացիական հասարակության խմբերի կողմից տրամադրված տեղեկություններ:

Վերոնշյալ փաստաթղթերում բարձրացված հարցերի թվում են հետեւյալները.

• խտրականության դեմ պայքար,

• ազգային փոքրամասնությունների իրավունքներ,

• սեռական կողմնորոշման եւ գենդերային ինքնության հիման վրա խտրականություն եւ ԼԳԲՏ անձանց պաշտպանություն,

• խոշտանգումների եւ վատ վերաբերմունքի արգելում,

• կամայական ազատազրկում, իրավապահ մարմինների աշխատակիցների պատասխանատվություն ուժի ոչ իրավաչափ կիրառման պարագայում,

• կանանց նկատմամբ բռնություն եւ բռնությունների զոհերի փոխհատուցում,

• դատական համակարգի անկախություն եւ արդարադատության մատչելիություն,

• կրոնի եւ համոզմունքի, խաղաղ հավաքների եւ արտահայտման ազատության իրացում,

• իրավական երաշխիքներ լրագրողների եւ իրավապաշտպանների համար, առողջապահական  ծառայությունների հասանելիություն,

• անվճար միջնակարգ կրթության ապահովում,

• հաշմանդամություն ունեցող անձանց զբաղվածության հնարավորություններ,

• արդարացի եւ բարենպաստ աշխատանքային պայմաններ,

• սեփականության իրավունքներ՝ կապված հանքարդյունաբերության նպատակով հողերի տրամադրման հետ: