նախընտրելի դարձնել
Ֆորդոյում միջուկային օբյեկտը գիտահետազոտական կենտրոնի կվերածվի, այնտեղ ուրանի հարստացման հզորություններ չեն լինի: Այս մասին հինգշաբթի Լոզանի բանակցություններից հետո Իրանի ԱԳ նախարար Ջավադ Զարիֆի հետ կայացած մամուլի ասուլիսում հայտարարել է Եվրամիության արտաքին հարաբերությունների անվտանգության քաղաքականության հարցերի գերագույն հանձնակատար Ֆեդերիկա Մոգերինին:
«Ֆորդոյի օբյեկտը ֆիզիկական հետազոտությունների գիտական կենտրոնի կվերածվի: Այդ նպատակով այնտեղ միջազգային գիտական համագործակցություն կծավալվի»,- հաղորդել է Մոգերինին:
ՏԱՍՍ-ի փոխանցմամբ, ուրանի հարստացումն իրականացվելու է Նաթանի միջուկային կենտրոնում:
Մոգերինին հայտարարել է, որ ԵՄ-ն եւ ԱՄՆ-ն միակողմանի պատժամիջոցների չեղարկումը կսկսեն ՄԱԿ-ի Անվտանգության խորհրդի պատժամիջոցների չեղարկմանը զուգահեռ:
Նրա խոսքով, Իրանի հետ համապարփակ համաձայնագրի քաղաքական սկզբունքների մասին պայմանավորվածություն է ձեռք բերվել: Բայց այն պետք է ՄԱԿ-ի Անվտանգության խորհրդի հավանությանն արժանանա:
Մոգերինին նաեւ հաղորդել է, որ փորձագետները սկսել են «վեցյակի» հետ Իրանի համապարփակ համաձայնության նախագիծ մշակել:
