նախընտրելի դարձնելՎերաքննիչ քրեական դատարանը մերժել է «Հեպատիտ Ց»-ի գործով ամբաստանյալների եւ մեղադրողի բողոքները:
Դատախազ Ա. Բարսեղյանը վերաքննիչ բողոք էր ներկայացրել՝ պահանջելով ավելի խիստ պատիժ սահմանել Քաջարանի բժշկական կենտրոնի արդեն նախկին տնօրեն Վարդան Ավագյանի եւ անեսթեզիոլոգ Երվանդ Ավագյանի նկատմամբ: Իրենց հերթին ամբաստանյալների պաշտպանները պահանջում էին արդարացման դատական ակտ:
Վերաքննիչը մերժել է բողոքներն ու ստորադաս դատարանի դատական ակտը թողել է անփոփոխ:
Հիշեցնենք, որ առաջին ատյանի դատարանը Քաջարանի ԲԿ-ի նախկին տնօրեն Վարդան Ավագյանը մեղավոր է ճանաչվել եւ դատապարտվել 1 տարվա ազատազրկման, փոխտնօրեն Վիրաբ Մանասյանը, ավագ բուժքույր Նորա Կարապետյանն ու գլխավոր բուժքույր Արմեդա Վանեսյանը` 6 ամսվա ազատազրկման: Չորս ամբաստանյալների վերաբերյալ դատարանը որոշել է պատիժը պայմանականորեն չկիրառել՝ սահմանելով փորձաշրջան: Բժիշկ- անեսթեզիոլոգ Երվանդ Ավագյանը նույնպես մեղավոր է ճանաչվել եւ դատապարտվել 1,5 տարվա ազատազրկման:
Ըստ մեղադրական եզրակացության՝ Քաջարանի ԲԿ-ի նախկին տնօրեն Վարդան Ավագյանը, փոխտնօրեն Վիրաբ Մանասյանը, բժիշկ-անեսթեզիոլոգ Երվանդ Ավագյանը, ավագ բուժքույր Նորա Կարապետյանն ու գլխավոր բուժքույր Արմեդա Վանեսյանը խախտել են սանիտարահամաճարակային անվտանգության կանոնները: Նրանց գործունեության հետեւանքով առաջացել է մարդկանց վիրուսային «Հեպատիտ Ց», ինչի հետեւանքով մի շարք քաղաքացիների առողջությանը անզգուշությամբ պատճառվել է կյանքին վտանգ սպառնացող ծանր վնաս:
