նախընտրելի դարձնելԵրեւանի ավագանին այսօր՝ դեկտեմբերի 23-ին պետք է շարունակեր նախօրեին սկսված եւ կիսատ մնացած իր նիստը, սակայն քվորում չկար: Քաղաքապետ Հայկ Մարությանը 30 րոպե ընդմիջում հայտարարեց, մինչեւ ավագանու անդամները ներկայանան:
Նշենք, որ նախօրեին հայտարարվեց, որ ավագանու «Իմ քայլը» խմբակցության անդամներ Հայկ Ցիրունյանը եւ Մեսրոպ Պապիկյանը դիմումներ են ներկայացրել ավագանու անդամի լիազորությունները դադարեցնելու մասին: Մինչ այդ նմանատիպ դիմում էր ներկայացրել նաեւ Արսեն Կարապետյանը: Երեւանի ավագանու «Իմ քայլը» խմբակցության մանդատները տրվել են Սերգեյ Գյոզալյանին, Վահե Օհանջանյանին, եւ Կարինե Փանոսյանին: Կարինե Փանոսյանը եւս դիմում է ներկայացրել ավագանու անդամի լիազորությունները դադարեցնելու մասին: Նրա մանդատը տրվել է Գեւորգ Աճեմյանին:
«Իմ քայլը» խմբակցության անդամներ Էռնես Ավանեսովը եւ Սերգեյ Գյոզալյանը դիմումներ են ներկայացրել խմբակցության կազմից դուրս գալու մասին, սակայն նրանք շարունակում են ավագանու անդամի իրենց լիազորությունները:
Երեկվա նիստում մի քանի թեժ բանավեճերից հետո ԲՀԿ խմբակցության անդամները հեռացան նիստերի դահլիճից եւ միացան ընդդիմության հանրահավաքին:
Այդ ընթացքում միջադեպ գրանցվեց ԲՀԿ-ականների եւ քաղաքապետարանի աշխատակիցներից մեկի միջեւ, բանը հասավ քաշքշոցների:
