նախընտրելի դարձնելԵրեւանի 60 բանուկ խաչմերուկներում եւ կանգառներում արդեն ավարտվել է տեսախցիկների տեղադրման գործընթացը: Հերթական աշխատանքային խորհրդակցության ժամանակ քաղաքապետ Կարեն Կարապետյանը հանձնարարել է համաժամանակյա ռեժիմով շարունակել մոնիտորինգի աշխատանքները եւ իրականացնել մշտական վերահսկողություն:
Քաղաքապետարանի մամուլի ծառայությունից NEWS.am-ին հայտնում են, որ «Անվտանգ քաղաք» հայեցակարգի շրջանակում քաղաքապետն առաջարկել է համատեղ ծրագիր իրականացնել` մեկ ընդհանուր բազայում համատեղելով ոստիկանության եւ այլ կառույցների տրամադրության տակ գտնվող տեսախցիկները:
Բնակչության անվտանգությունն ապահովելու նպատակով տեսախցիկներ են տեղադրվում նաեւ Երեւանի մետրոպոլիտենում:
Հանձնարարվել է աշխատանքներն ավարտել սահմանված ժամկետներում եւ լուրջ ուշադրություն դարձնել մետրոյի սպասարկման որակին:
Անդրադառնալով ապօրինի, ժամկետանց եւ չգործող կրպակների ապամոնտաժման գործընթացին, Կարեն Կարապետյանը հանձնարարել է հետեւողականորեն շարունակել աշխատանքը, միաժամանակ շեշտելով, որ նոր կրպակների տեղադրման թույլտվություն չի տրվելու:
Զեկուցվել է, որ հուլիսի 1-ի դրությամբ մայրաքաղաքում արդեն ապամոնտաժվել է 893 ապօրինի, չգործող կրպակ:
