ՆախընտրելիԴատարանում ներկայացվել է միայն Աշոտ Փաշինյանի ցուցմունքը եւ հաղորդումը, եւ տեսագրությունները, ներառյալ այն տեսագրությունները, որոնք մենք ինքներս էինք հրապարակել, այլ որեւէ բան չի ներկայացվել: Այս մասին այսօր՝ մայիսի 19-ին, դատարանի մոտ լրագրողների հետ զրույցում նշեց 44-օրյա պատերազմում զոհված ժորա Մարտիրոսյանի մոր՝ Գայանե Մարտիրոսյանի պաշտպան Վահան Հովհաննիսյանը։
«Ընդ որում, տեսագրություններով բուն դեպքը տեսանելի չէ, տեսանելի է միայն ավտոմեքենայից դուրս գալու եւ նստելու հանգամանքները:
Տիկին Մարտիրոսյանին մեղասագրվում է արարք, որը կատարվել է ավտոմեքենայի սրահում: Սրահում կատարված դեպքի, առերեւույթ հանցանքի վերաբերյալ տեսագրությունները որեւէ բան չեն պարունակում, ապացուցողական նշանակություն ունեցող տեղեկություններ չեն պարունակում, հետեւաբար, միակ այդպիսի տեղեկություն պարունակող փաստաթուղթն ու ապացույցը հանդիսանում են պարոն Փաշինյանի ցուցմունքները»,-ասաց նա:
Նշենք, որ Շենգավիթի ընդհանուր իրավասության դատարանն այսօր՝ մայիսի 19-ին, քննում է 44-օրյա պատերազմում զոհված Ժորա Մարտիրոսյանի մայրիկին՝ Գայանե Մարտիրոսյանին կալանավորելու միջնորդությունը։
Հիշեցնենք, որ մայիսի 17-ին, վարչապետի ընտանիքին պատկանող «Հայկական ժամանակը» տեղեկություն էր տարածել, թե «Որդիների կանչ» ՀԿ–ի անդամները փորձել են առեւանգել վարչապետի որդուն։ Ըստ թերթի` զոհված զինծառայողների ծնողները ստիպել են Աշոտ Փաշինյանին նստել իրենց մեքենան, սակայն նրան հաջողվել է դուրս նետվել մի պահ կանգ առած մեքենայից, ինչի հետեւանքով նրան վրաերթի է ենթարկել նույն կազմակերպության անդամների հետեւից ընթացող մեքենան:
Աշոտ Փաշինյանը դեպքի առնչությամբ հաղորդում է ներկայացրել: Քննչական կոմիտեում նախաձեռնվել է քրեական վարույթ՝ մարդուն առեւանգելու հոդվածով, ձերբակալվել է Գայանե Մարտիրոսյանը։
Տիկին Գայանեն անժամկետ հացադուլ է հայտարարել։
