ՆախընտրելիԻսրայելցի զինվորականները պատրաստվում են դիմավորել երկու նավերի, որոնք ուղեւորվում են Գազայի հատված` դրա ծովային շրջափակումը ճեղքելու նպատակով: Այս մասին հաղորդում է «ՌԻԱ Նովոստին»` վկայակոչելով Իսրայելի պաշտպանական բանակի մամուլի ծառայությանը: Այնտեղից հայտնել են, որ «Գազայի հատվածի շրջափակումը խախտելու փորձը սադրանք է Իսրայելի պետության դեմ: Շրջափակումն օրինական է եւ համապատասխանում է միջազգային իրավունքի նորմերին»: Իսրայելցի զինվորականներն էլ հայտնել են, որ ցանկացած մարդասիրական օգնություն Գազայի հատված կարող է հասցվել ցամաքային սահմանի անցակետերով եւ Իսրայելի իշխանությունների համակարգմամբ:
Նշենք, Թուրքիայի արեւմուտքում գտնվող Ֆաթիհա նավահանգստից Գազա է ուղեւորվել երկու նավ, Ազատության նավատորմի կազմից` տեղափոխելով 27 միջազգային իրավապաշտպանների եւ մարդասիրական օգնություն:
Ինչպես նոյեմբերի 2-ին լրագրողներին հայտնեց Գազայում «Գազայի շրջափակումը ճեղքելու եվրոպական ընկերության» ներկայացուցիչ Ռամի Աբդուն, նոր կազմում երկու նավ կա Իռլանդիայից եւ Կանադայից: Ենթադրվում է, նրանք կհասնեն անկլավի ափերին 30 ժամվա ընթացքում: Թուրքական իշխանությունները, նրա խոսքով, երկու օր ու գիշեր չեն թույլատրել նավերին դուրս գալ նավահանգստից եւ կրճատել են առաքելության մասնակիցների թիվը, ովքեր բժշկական հազվագյուտ դեղամիջոցներ էին տեղափոխում անկլավի բնակիչների համար: Կազմակերպիչները նախընտրել են նավերի ժամանման ժամը չհայտարարել` վախենալով տեղեկատվության արտահոսքից:
Ինչպես նշեց Աբդուն, նոր առաքելության հետ կապված բոլոր մանրամասները կհայտարարվեն հինգշաբթի օրը` Իռլանդիայի մայրաքաղաք Դուբլինում կայանալիք մամլո ասուլիսի ընթացքում:
Առաքելության պաշտոնական ներկայացուցչի տվյալներով` մասնակիցների թվում են Նոբելյան մրցանակակիրներ, իռլանդական կուսակցական առաջնորդներ` «Շին Ֆեյն» կուսակցության անդամներ, ինչպես նաեւ «Ալ Ջազիրա» հեռուստաընկերության եւ զանգվածային լրատվության այլ հայտնի միջոցների ներկայացուցիչներ Կանադայից եւ Իռլանդիայից:
Նշենք, Թուրքիայի եւ Իսրայելի հարաբերությունները սրվել էին այն բանից հետո, երբ Թել-Ավիվը հրաժարվել էր պաշտոնապես ներողություն խնդրել Թուրքիայից` կապված 2010թ. մայիսին փոթորկի արդյունքում «Ազատության նավատորմի» կազմի «Մավի Մարմարա» նավի խորտակման հետ, որի հետեւանքով այդ երկրի քաղաքացիներ էին զոհվել:
Այդ միջադեպից հետո Թուրքիան հետ էր կանչել երեք դիվանագետների:
