ՆախընտրելիՄոսկովյան Լյուբլինո շրջանում սկսել է «Ռուսական քայլերթը», հայտնում է Газета.Ru-ն: Երթին մասնակցում է գրեթե հինգ հազար մարդ, թեեւ ավելի վաղ կազմակերպիչները հայտարարել էին, որ մոտ 20 հազար մարդ կհավաքվի:
Մասնակիցները շարքեր են կազմել` ձեռքներին դրոշներ եւ պաստառներ, եւ լոզունգներ են կրկնում, մասնավորապես` «Ռուսաստանը ռուսների համար, Մոսկվան` մոսկվացիների», «Ռուսներ, առաջ», «Բավական է կերակրել Կովկասին»:
Նրանք նաեւ գոռում են «Մենթերը Ռուսաստանի ամոթն են», բայց ոստիկանության աշխատակիցները չեն արձագանքում:
Քայլերթի մասնակիցները լրագրողների հանդեպ թշնամաբար են տրամադրված, գոռում են «Հեռացրեք լրագրողներին»: Երբ շարասյան առաջին շարքը նկարող լուսանկարիչներից մեկը մոտեցել է երթի մասնակիցներին, նրան բռնել են եւ հարվածել դեմքին: Կազմակերպիչները փորձում են հանգստացնել մասնակիցներին:
Այն փողոցում, որտեղ անցկացվում է երթը, տրանսպորտի երթեւեկությունը դադարեցվել է:
Ավելի վաղ «Ռուսական քայլերթի» կազմակերպիչներից մեկը` Կոնստանտին Կռիլովը ձերբակալվել էր, նրա նկատմամբ հարուցվել է քրեական գործ` «ազգամիջյան ատելություն բորբոքելու» մեղադրանքով:
Նախօրեին ԱՄՆ դեսպանատունն իր քաղաքացիներին խորհուրդ էր տվել ուրբաթ օրը Լյուբլինո չգնալ` «Ռուսական քայլերթի» պատճառով:
