նախընտրելի դարձնելԵրեկ` հուլիսի 26-ին Վանաձորում տեղի ունեցած խոշոր ավտովթարի (ֆոտոռեպորտաժ) փաստով Լոռիի մարզի քննչական բաժնում հարուցվել է քրեական գործ ՀՀ Քրեական օրենսգրքի 242 հոդվածի 3-րդ մասի (ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու եւ ավելի մարդու մահ) հատկանիշներով:
Ավելի վաղ NEWS.am-ը տեղեկացրել էր, որ «ՎԱԶ 2106» մակնիշի 36 ԼՍ 427 համարանիշի ավտոմեքենայի վարորդը, Վանաձոր քաղաքի Երեւանյան խճուղու վրա, դուրս է եկել ճանապարհի երթեւեկելի մասից եւ բախվել ծառին: Վթարի հետեւանքով 2 տղամարդ մահացել էին, իսկ 3 հոգի ծայրահեղ ծանր վիճակում տեղափոխվել էին Վանաձորի թիվ 1 հիվանդանոց:
Վթարի հետեւանքով տուժած 4 քաղաքացիներից` Արեն Կյուրղինյանը եւ Մայիս Ղանաղյանը մահացել էին Վանաձորի թիվ 1 բժշկական կենտրոն տեղափոխվելու ճանապարհին: Մյուս երկու տուժողները` 26-ամյա Կարեն Ղարագյոզյանը եւ Ավետիք Կուրղինյանը տեղում էին մահացել: Իսկ 5-րդ տուժողի` Տիգրան Կուրղինյանի վիճակը բժիշկները ծայրահեղ ծանր են գնահատում։ Վերջինիս տեղափոխել են Վանաձորի բժշկական կենտրոն, այնուհետ Երեւան:
Դեպքի վայր է ժամանել Ոստիկանության Լոռիի մարզային վարչության օպերատիվ խումբը՝ մարզային վարչության օպեր-գծով տեղակալ Արամ Ղազարյանի եւ Ոստիկանության քննչական գլխավոր վարչության Լոռիի մարզի քննչական խումբը՝ բաժնի պետի տեղակալ Վահագն Հակոբյանի գլխավորությամբ:
Հաշվի առնելով պատահարի բնույթը՝ դեպքի վայր է մեկնել նաեւ Լոռիի մարզի դատախազ Կարեն Շահբազյանը: Ժամանել են նաեւ Ճանապարհային ոստիկանության 2-րդ սպայական գումարտակի 5-րդ վաշտի 1-ին դասակի աշխատակիցները՝ վաշտի հրամանատարի տեղակալ Մարտիկ Բալայանի եւ դասակի հրամանատար Կարեն Բոյաջյանի գլխավորությամբ: Խոսակցությունների համաձայն մինչեւ վթարը տեղի է ունեցել պայթյուն:
Լուսանկարները` Էդվարդ Արզումանյանի
