նախընտրելի դարձնել«Նոր Մոսկվայում» ուղեւորատար ավտոբուսին հարվածած մանրաքար տեղափոխող բեռնատարը տարանցիկ համարներ է ունեցել: Մոսկվայի ՆԳՆ վարչության տվյալներով, վարորդը վկայական ստացել է ոչ թե Ռուսաստանում, այլ Հայաստանում: Բեռնատարը դեռ գարնանից հաշվառումից հանված է եղել:
Ավելի վաղ Մոսկվայի փոխքաղաքապետի պաշտոնակատար Պյոտր Բիրյուկովը հայտնել էր, որ վարորդը Հայաստանի 46-ամյա քաղաքացի է եղել: Մեկ տարվա ընթացքում նա վարչական վեց տույժի է ենթարկվել՝ երթեւեկության կաննոները խախտելու համար: Բեռնատարի վարորդը հոսպիտալացվել է, այս պահին նրան հարցաքննում է ոստիկանությունը:
Բժիշկներն իրենց հերթին նշում են, որ վարորդը գտնվում է Բոտկինի հիվանդանոցում եւ նրա վիճակը ծանր է:
Life News-ի հրապարակած տուժածների նախնական ցուցակներում հայկական մեկ անուն-ազգանուն կա՝ Հրաչյա Հարությունյան, 46 տարեկան:
Նշենք, որ վթարի զոհ է դարձել 18 մարդ: Երեք մարդ մահացել էր Պոդոլսկի հիվանդանոց տեղափոխվելուց հետո: Վթարից եւս մեկ տուժած վախճանվել էր Մոսկվայի Սկլիֆասովսկու անվան ինստիտուտում: Ավելի վաղ հաղորդվել էր, որ զոհվել է 14 մարդ:
Պոդոլսկի մոտակայքի վթարը տեղի էր ունեցել Մոսկվայի Տրոիցկի շրջանում՝ Օզնոբիշինո գյուղի հարեւանությամբ, հուլիսի 13-ին, ժ. 13:00-ին: Մանրաքար տեղափոխող բեռնատարը դուրս գալով երկրորդական ճանապարհից բախվել էր ԼԻԱԶ ավտոբուսին, որում եղել էր 41 մարդ: Ավտոբուսը 1033 համարի երթուղին էր իրականացնում՝ Պոդոլսկից Մոսկվա եւ Ժոխովո:
