ՀՀ քաղաքաշինության նախարարության տվյալով՝ հանրապետությունում թուրքական շինընկերություններ չեն աշխատում:
Այս մասին Գործադիրի հոկտեմբերի 2-ի նիստում հայտարարել է քաղաքաշինության նախարար Նարեկ Սարգսյանը: Նա ինքն այդ մասին տեղեկացել է մամուլից եւ հանձնարարել ստուգել տեղեկատվությունը:
Նախարարությունը դիմել է Երեւանի քաղաքապետարան՝ որպես մայրաքաղաքի տարածքում շինթույլտվություններ տրամադրող մարմին: Թուրքիայից որեւէ ընկերության թույլտվություն այնտեղ չի տրամադրվել:
«Նույն պատասխանը ստացանք մարզպետարաններից: Հետեւաբար, մեր տվյալներով, Հայաստանում Թուրքիայից կառուցապատողներ այս պահին չկան: Եթե այդպիսիք լինեին էլ, ես դրանում վատ բան չեմ տեսնում: Ուղղակի փաստն եմ արձանագրում», - նշել է Սարգսյանը:
NEWS.am-ն ավելի վաղ «Sabah» թերթը վկայակոչելով հայտնել էր, որ «Ozturkler holding» ընկերության նախագահ Յուսուֆ Օզթյուրքը հայտարարել է Երեւանում բնակելի շենք կառուցելու մասին: