Ուրբաթ օրը՝ դեկտեմբերի 12 -ին, դոլարի պաշտոնական փոխարժեքը հասել էր ռեկորդային 462,81 դրամ ցուցանիշի: Նման ցուցանիշ մեկ էլ հեռավոր 2004-ի մարտին էր գրանցվել:
Տարբերությունը միայն այն էր, որ այդ շրջանում դոլարը թուլանում էր եւ դրա փոխարժեքն աստիճանաբար նվազում էր՝ 2008-ի մարտին հասնելով 302 դրամից էլ ցածր ցուցանիշի:
Այսօր դոլարն ուժեղանում է ոչ թե օրով, այլ ժամով: Մայրաքաղաքի առանձին փոխանակման կետերում դոլարի գինը հաշված ժամերում ավելացել էր 6-7 դրամով:
Այս ուրբաթ մեր հյուսիսային հարեւան Ռուսաստանում դոլարը կրկնել էր պատմական հակառեկորդը՝ հասնելով 57,5 ռուբլու: Հետաքրքիրն այն է, որ ռուբլին թուլանում է Ռուսաստանի արտաքին առեւտրի հսկայական պրոֆիցիտի ֆոնին: Այսպես, հունվար-սեպտեմբերին դրա առեւտրային հաշվեկշռի դրական սալդոն աճել էր մինչեւ 164 մլրդ դոլարի:
Բայց Ռուսաստանի բոլոր դժբախտություններին գումարվեց կապիտալի արտահոսքը, որը ընթացիկ տարում կազմել է 120 մլրդ դոլար: Գումարած խուճապը, որը շատ ռուսաստանցիների դրդում է զերծ մնալ խնայողությունները թուլացող ռուբլով պահելուց:
Նշենք, որ Ռուսաստանում ազգային եւ արտասահմանյան արժույթով ներդրումների գումարների հարաբերակցությունը մեր իրողությունների ճիշտ հակառակն է: Այսպես, հոկտեմբերի 1-ին ռուբլով խնայողությունները գրեթե 4 անգամ գերազանցել են արտասահմանյան արժույթով ներդրումները: Սակայն մեկ տարվա ընթացքում ռուբլով ներդրումներն աճեցին 5%-ով, իսկ արտասահմանյան արժույթով՝ 17%-ով: Իսկ մեր ներդրողները հիմնականում դոլար են նախընտրում, ինչպես նաեւ եվրո:
Ի տարբերություն Ռուսաստանի՝ մենք մեծ դեֆիցիտ ունենք արտաքին առեւտրի շրջանառությունում: Մեզ մոտ դոլարները արտահանմամբ են հասնում, մասնավոր տրանսֆերտներով, արտասահմանյան վարկերով եւ ներդրումներով: Վերջին երեք աղբյուրները ներկայումս ցամաքել են, իսկ արտահանումը զիջել է ներմուծմանը: Ադյունքում դոլարի մասով լարված իրավիճակ է ստեղծվել:
Շատերը կհիշեն տասնամյա վաղեմության իրադարձությունները, երբ մեր ԿԲ-ն պարզապես թելադրում էր դոլարի փոխարժեքը: Դոլարի փոխարժեքի համաշխարհային անկման ալիքին զուգահեռ, «մենք» ռեկորդ սահմանեցինք. Այն Հայաստանում կրկնակի թուլացավ: Ինչո՞ւ այժմ այդ հեղինակավոր գերատեսչությունը «չի կարողանում հաղթահարել» իրարանցումը եւ դոլարի զանգվածային սպեկուլյացիաները, կարելի է միայն գուշակել: