Հայաստանի իշխանություններին ձեռնտու չէ քաղաքական եւ հասարակական զանգվածների միավորումը, քանի որ դա նրանց համար վտանգավոր է: Այս մասին, այսօր՝ հուլիսի 3-ին՝ լրագրողների հետ հանդիպման ժամանակ, նշել է քաղտեխնոլոգ Արմեն Բադալյանը:
Նրա խոսքով՝ հենց այդ պատճառով իշխանությունները միշտ փորձել են բաժանել այս երկու երեւույթները եւ շրջանառության մեջ մտցնել «քաղաքացիական շարժում» արհեստական եզրը: Անդրադառնալով էլեկտրաէներգիայի սակագնի բարձրացման դեմ բողոքի ցույցերի բնույթին՝ նա նշեց. «Այստեղ բազմաթիվ շահեր էին միախառնված, որոնք համընկնում էին: Այդ ամենը վերջացավ, նրանք իրենց խնդիրը կատարեցին: Այն, ինչ տեղի է ունենում հիմա, պիոներական ճամբար է հիշեցնում, որը իրականության հետ ոչ մի կապ չունի»,- ընդգծեց Բադալյանը:
Նա նշեց, որ այստեղ միանշանակ շահ ունեին իշխող ուժերը, քանի որ կան էլեկտրաէներգիա արտադրողներ, որոնց ձեռնտու չէ թանկացումը: «Կար նաեւ տնտեսական կողմ, որը կապված էր ՀԷՑ-ի եւ Որոտանի կասկադ ՀԷԿ-ի հետ: Կար նաեւ Ռուսաստանի գործոնը. մենք տեսանք, թե ինչպես մամուլում փոխվեց ակցիայի նկատմամբ նրանց թեմատիկան: Կար Արեւմուտքի գործոնը, կային ընդդիմադիր գործիչների շահերը»,- նշեց Բադալյանը՝ հավելելով, որ ոչ մի օգուտ նրանք չստացան: