Հուլիսի 4-ին վաղ առավոտյան ՀՀ ԳՆ սննդամթերքի անվտանգության պետական ծառայության Արարատի մարզայի կենտրոնը առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ից ահազանգ է ստացել այն մասին, որ թունավորուման ախտանշաններով Արտաշատի բժշկական կենտրոն է դիմել 12 քաղաքացի:
Սննդամթերքի անվտանգության պետական ծառայության մարզային տեսուչներն ահազանգն ստանալուց հետո անմիջապես այցելել են Արտաշատ շատ քաղաքի «Արարատ» ռեստորան, որտեղ նշված անձինք նախորդ երեկոյան մասնակցել են խնջույքի: Տեսուչները նախ ճշտել են, թե թունավորված անձինք ինչ են կերել, ապա սննդամթերքի բոլոր տեսակներից նմուշառում են կատարել և ուղարկել լաբորատոր փորձաքննության, որի արդյունքների մասին կտեղեկացնենք լրացուցիչ:
ՍԱՊԾ մասնագետները նաև հանձնարարականներ են տվել՝ մասնավորապես շոգ եղանակային պայմաններում վտանգավոր դարձող սննդամթերքը ճաշացանկից բացառելու մասին:
Ավելի վաղ NEWS.am-ը հայտնել էր, որ Արտաշատի բժշկական կենտրոն են դիմել տարբեր տարիքի 10 բնակիչ, որոնցից 2-ը՝ 4-ից 14 տարեկան: Նրանց բոլորի մոտ դիտվել են նույն ախտանշանները` սրտխառնոց, փսխում, միայն 9 տարեկան մի երեխայի մոտ՝ նաեւ թուլություն:
Նշենք, որ գիշերվա ընթացքում դիմել է եւս 2 անձ՝ նույն գանգատներով: Արձանագրվել է ընդհանուր թվով 12 հիվանդ (2-ը 0-14 տարեկան). 4-ը՝ Կոտայքի մարզի Աբովյան քաղաքի, 1-ը՝ Արարատի մարզի Զանգակատուն գյուղի եւ 7-ը՝ Արմաշ գյուղի բնակիչներ:
Հիվանդներից մեկի վիճակը գնահատվել է միջին ծանրության, մյուսներինը՝ թեթեւ: Բոլոր հիվանդները ստացել են անհրաժեշտ բուժօգնություն եւ առողջացումով դուրս են գրվել հիվանդանոցից: Ներկայումս հոսպիտալացված հիվանդներ չկան:
ՀՀ առողջապահության նախարարության մասնագետների խումբն անմիջապես իրականացրել է համաճարակաբանական հետազոտություն, որի արդյունքում պարզվել է, որ բոլոր հիվանդները Արտաշատ քաղաքի ռեստորաններից մեկում մասնակցել են խնջույքի: Հաշվառվել են խնջույքի բոլոր մասնակիցները, որոնք համաճարակաբանական հետազոտության պահին եղել են ռեստորանում, նրանց բացատրվել է, որ գանգատներ ունենալու դեպքում դիմեն բժշկական օգնության, կազմակերպվել եւ իրականացվել են բակային համայցեր: Ռեստորանում քննչական մարմինների, Սննդի անվտանգության պետական ծառայության աշխատակիցների մասնակցությամբ իրականացվել են սննդի մնացորդներից նմուշառումներ: Նմուշառումներ են իրականացվել նաեւ ջրից եւ հիվանդների կենսաբանական նյութերից:
