Գիտնականների խումբը հաստատել է երիտասարդ աստղ HD 100546-ի ուղեծրում հսկայական մոլորակի գոյության փաստը: Հայտնաբերված մոլորակը պտտվում է իր «ծնողական» աստղի շուրջը եւ տեսքով նման է Արեգակնային համակարգից Յուպիտերին:

Ավելի վաղ՝ 2013 թվականին, գիտնականները ենթադրություն էին հայտնել HD 100546 աստղի ուղեծրում գազային մոլորակի առկայության մասին: Չիլիի աստղադիտարանում տեղակայված Very Large Telescope աստղադիտակի օգնությամբ իրականացված դիտարկման եւ արված մի քանի լուսանկարների արդյունքում գիտնականները կարողացել են հաստատել այդ հիպոթեզը, հաղորդում է Planet-today-ը:

ND 100546b աստղի ուղեծրում գտնվող հսկա մոլորակը ներկայում դեռեւս ձեւավորման փուլում է: Ամենայն հավանականությամբ, այն շրջապատված է սկավառակով, որից մոլորակը կազմավորման համար անհրաժեշտ նյութ է վերցնում:

Գիտնականների խոսքով, հենց դա էլ իրենց հնարավորություն կընձեռի ավելի լիարժեք պատկերացում կազմել մոլորակների ձեւավորման գործընթացի մասին: