Վենետիկի հանձնաժողովն իր մասնագիտական կարծիքն է ներկայացնում՝ խորամուխ չլինելով Հայաստանի քաղաքական խնդիրների եւ անվտանգության հարցերի մեջ: Այս մասին NEWS.am-ի թղթակցի հետ զրույցում հայտարարեց ՀՀ Ազգային ժողովի արտաքին հարաբերությունների հանձնաժողովի նախագահ, ՀՀԿ պատգամավոր Արտակ Զաքարյանը՝ անդրադառնալով հարցին, որ Վենետիկի հանձնաժողովն առաջարկել է հանել երկփուլ ընտրությունների մասին դրույթը եւ այն ներառել Հայաստանի Ընտրական օրենսգրքում:
«Մենք ղեկավարվում ենք մեր պետության շահերով: Մեզ անհրաժեշտ է իրավական տեսանկյունից երաշխավորված գործող մեծամասնություն ունենալ: Եթե մեր երկիրը, Աստված մի արասցե, ներքաղաքական ցնցումների ենթարկվի, եւ ուժերի հարաբերակցության պայմաններում անհնար լինի կայուն մեծամասնություն, իշխանություն ձեւավորել եւ պատասխանատվություն ստանձնել պետության եւ հասարակության առջեւ, այդ դեպքում Վենետիկի հանձնաժողովի առաջարկությունը մեզ համար օգտակար չի լինի, եւ մեր խնդիրները չեն լուծվի»,- նշեց Արտակ Զաքարյանը:
Նրա խոսքով, հարկավոր է լիարժեք ապահովել որոշումների ընդունման գործընթացը: «Այսինքն՝ երկրում չպետք է իրավիճակ ստեղծվի, որի դեպքում, ընդդիմության քմահաճույքի պատճառով, որոշում չի կայացվի կամ մենք կհայտնվեն ճգնաժամային իրավիճակում: Մենք պետք է ապահովագրված լինենք դրանից: Շնորհակալություն Վենետիկի հանձնաժողովին, բայց կան խնդիրներ, որոնք պետք է ինքներս լուծենք»,- ընդգծեց պատգամավորը:
Անդրադառնալով հարցին, կարո՞ղ են, արդյոք, խորհրդարանական ուժերը, մասնավորապես՝ քաղաքական մեծամասնությունն ու ընդդիմությունը, փոխհամաձայնության հասնել պատասխանատու մի շարք պաշտոնների ընտրության հարցում, ինչպիսիք են, օրինակ, Կենտրոնական ընտրական հանձնաժողովի, Կենտրոնական բանկի ղեկավարները, գլխավոր դատախազը, Արտակ Զաքարյանը պատասխանեց. «Կարծում եմ՝ այո, քանի որ բոլոր խնդիրները լուծվում են բանակցությունների արդյունքում, այսինքն՝ եթե որեւէ թեկնածու խորհրդարանի 3/5-ի համար ընդունելի չլինի, ապա կգտնվեն թեկնածուներ կամ թեկնածու, որոնք ընդունելի կլինեն: Դա խնդիր չէ»:
