ՆԱՍԱ-ի գիտնականները համարում են, որ Մարսում հայտնաբերված ջուրը մեծացնում է արտերկրային կյանք հայտնաբերելու շանսերը։ Առայժմ աստղագետները չեն համարձակվում պնդել, թե Մարսում կյանք գոյություն ունի, սակայն նշում են, որ ջրի առկայությունը կյանքի ծագման առանցքային պայման է։ ՆԱՍԱ-ի մոլորակագիտության բաժնի տնօրեն Ջեյմս Գրինը, մեկնաբանելով Մարսի լեռնալանջերին գետերի հայտնաբերման փաստը, հայտարարել է, թե դեռ վաղ է պնդել, թե կարմիր մոլորակի վրա կյանք գոյություն ունի։
Գրինը նշել է, որ ջրի առկայությունը արտերկրային կյանքի ձեւավորման հիմնական պայմանն է։ Ավելի վաղ տիեզերական գործակալության փորձագետները ավելի կտրականորեն էին տրամադրված եւ Մարսը «անկյանք մոլորակ» էին կոչում։ Այժմ գիտնականները զբաղված են դեպի Մարս կառավարվող մոլորակագնաց ուղարկելու նախագծի մշակմամբ, որըկկարողանա ավելի մանրամասն տեղեկատվություն տրամադրել կարմիր մոլորակի տարածքի վերաբերյալ, որտեղ աղային հոսքեր են նկատվել, փոխանցում է VistaNews-ը։