Ռուսաստանի նախագահ Վլադիմիր Պուտինը հայտարարել է, որ ԱՄՆ-ը պիտի Ռուսաստանի Պաշտպանության նախարարությանը տեղեկություններ տրամադրի Սիրիայում «Իսլամական Պետության» գրոհայինների գտնվելու վայրերի մասին, փոխանցում է ՌԻԱ Նովոստին։
«Եթե նա (ԱՄՆ-ը) պնդում է, թե իրավիճակին ավելի լավ է ծանթ, որովհետեւ արդեն մեկ տարուց ավելի աշխատում են սիրիական տարածքում, ընդ որում՝ անօրինական, ես նրանց ասել եմ, բայց եթե աշխատում են եւ ավելի լավ են ծանոթ իրավիճակին, թող մեզ փոխանցեն այն թիրախները, որ պարզել են այս ընթացքում, եւ մենք դրանք կօգտագործենք», — հայտարարել է Պուտինը Պաշտպանության նախարար Սերգեյ Շոյգուի հետ հանդիպման ընթացքում։
Ավելի վաղ NEWS.am-ը հաղորդել էր, որ ՆԱՏՕ-ում ԱՄՆ-ի ներկայացուցիչ Դուգլաս Լյուտը հայտարարել է, որ ՆԱՏՕ-ն Մոսկվային չի տրամադրի հետախուզության տվյալները այնքան ժամանակ, քանի դեռ Ռուսաստանը աջակցում է Սիրիայի նախագահ Բաշար Ասադի վարչակարգին։
