Սիրիայի հարցում Թուրքիայի վարած քաղաքականությունը կատարյալ ձախողման վտանգի առաջ է հայտնվել։ Այս մասին փետրվարի 5-ին կայացած մամուլի ասուլիսի ժամանակ ասել է ՀՀ ԳԱԱ Արեւելագիտության ինստիտուտի տնօրեն, թուրքագետ Ռուբեն Սաֆրաստյանը։
Նրա խոսքով՝ Սիրիայի նախագահ Բաշար Ասադը աստիճանաբար ուժեղացնում է իր դիրքերը։ «Տարածաշրջանը, մասնավորապես Սիրիան, ճգնաժամի զարգացման նոր փուլի շեմին է։ Սիրիայում կսկսեն նոր երկրների ուժեր տեղակայել։ Մասնավորապես Սաուդյան Արաբիան արդեն հայտնել է նման մտադրության մասին։ Ամերիկյան կոալիցիան արդեն լրջորեն դիտարկում է Սիրիայում օտարերկրյա պետությունների զորքեր տեղակայելու հնարավորությունը»,- նշել է թուրքագետը։
Անդրադառնալով Սիրիայի հարցում Թուրքիայի վարած քաղաքականությանը՝ նա նշել է, որ Թուրքիան կորցնում է թուրք-սիրական սահմանի այն հատվածի վերահսկողությունը, որը հնարավորություն էր տալիս ազդել Սիրիայի ճգնաժամի վրա։ «Հաշվի առնելով, որ Թուրքիայի ղեկավարը Էրդողանն է, ով միշտ պատրաստ է արկածախնդիր ու իռացիոնալ քայլերի դիմել, մոտ ապագայում Անկարան կփորձի Հյուսիսային Սիրիայում ներխուժում իրականացնել»,- ասել է Սաֆրաստյանը։
