Առողջապահության համաշխարհային կազմակերպությունը կարծում է, որ 25 մլն դոլար է անհրաժեշտ Զիկա վիրուսի դեմ պայքարի կիսամյակային ծրագիրն իրականացնելու համար: Միջոցները պետք է հատկացվեն հետազոտությունների նպատակով, որոնք պետք է պարզեն սեռական ճանապարհով եւ արյան փոխներարկման միջոցով վիրուսի փոխանցման ճանապարհները:
ԱՀԿ համավարակային եւ համաճարակային բաժնի ղեկավար Սիլվիա Բրայանդը հայտնել է, որ հղի կանայք պետք է վիրուսակիր երկրներում խորհրդատվությունների եւ տեխնոլոգիաների հասանելիություն ունենան, որոնք թույլ կտան վստահորեն նշել, արդյոք պտուղը վիրուսի հարուցած միկրոցեֆալիա ունի, փոխանցում է RIA Novosti-ն՝ վկայակոչելով Reuters-ը:
Հիշեցնենք, որ Զիկա վիրուսը նորածինների մոտ միկրոցեֆալիայի, այն է` գանգի եւ ուղեղի չափերի նվազման է հանգեցնում: Անցյալ տարի այն առաջին անգամ ախտորոշել էին Բրազիլիայում, իսկ այժմ այն տարածվում է ամբողջ Լատինական Ամերիկայով: