«Սասնա ծռեր» խմբի անդամ Սեդրակ Նազարյանի ընտանիքին օգնելու համար այսօր՝ օգոստոսի 18-ին, Երեւանի Հյուսիսային պողոտայում դրամահավաք է սկսել «Աջակցենք Սեդրակ Նազարյանի ընտանիքին» նախաձեռնությունը։ NEWS.am-ի հետ զրույցում կազմակերպիչները նշեցին, որ դրամահավաքը շարունակվելու է նաեւ օգոստոսի 19-ին: Դրամահավաքի ավարտից անմիջապես հետո գումարը փոխանցվելու է Սեդրակի հարազատներին:
Նշենք, որ Սյունիքի մարզի Սպենդարյան գյուղում բնակվող Սեդրակ Նազարյանի տարեց ծնողները Սեդրակի կալանավորումից հետո ծանր սոցիալական պայմաններում են հայտնվել, նրանք ապրում են 42 հազար դրամ թոշակով:
Հիշեցնենք, որ Սեդրակ Նազարյանին մեղադրանք է առաջադրվել Քրեական օրենսգրքի 218-րդ հոդվածի 3-րդ մասի 1-ին կետով (պատանդ վերցնելը, որը կատարվել է կազմակերպված խմբի կողմից), 219-րդ հոդվածի 3-րդ մասի 1-ին կետով (շենքեր, շինություններ, տրանսպորտի, հաղորդակցության կամ կապի միջոցներ զավթելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից)։ Ըստ փաստաբանների՝ Սեդրակ Նազարյանը հայտարարել է, որ մեղադրանքն իրեն պարզ չէ, հրաժարվել է ցուցմունք տալ ու հարցերին պատասխանել, քանի որ 12 օր ապօրինի զրկվել է ազատությունից եւ արտաքին աշխարհի հետ որեւէ կապից:
