Հայաստանի Ազգային ժողովն այսօր՝ հոկտեմբերի 19-ին, 104 կողմ, դեմ 4, 1 ձեռնպահ ձայներով ընդունել է Ընտրական օրենսգրքում փոփոխություններ կատարելու մասին եւ հարակից օրենքների փաթեթը:

Օրինագիծն առաջարկում է հրապարակել քվեարկածների ցուցակները, որպեսզի բացառի կասկածները, թե օգտագործվել են քվեարկությանը չմասնակցած քաղաքացիների ձայները։ Այդ ցուցակները տեղամասային ընտրական հանձնաժողովներից կփոխանցվեն  ընտրատարածքային հանձնաժողովներին, իսկ դրանք էլ հաջորդ օրը ժամը 12։00–ից սկսած՝  24 ժամվա ընթացքում պետք է սքանավորեն եւ հրապարակվեն ԿԸՀ կայքի առանձին բաժնում։ Դրանցից յուրաքանչյուրին կկցվեն տեղամասերի եւ ընտրական տարածքի համարները։

Առաջարկվում է բոլոր ընտրատեղամասերում մշտական նկարահանում իրականացնել եւ հեռարձակել օնլայն ռեժիմով։ Նկարահանման եւ տեսանյութերի փոխանցման ու պահպանման կարգը կմշակի հանձնաժողովը, որում իշխանությունը չի ունենա վճռորոշ ձայն։ Այդ նույն հանձնաժողովը կընտրի նկարահանող կազմակերպությանը։

Առաջարկվում է քրեական պատիժ սահմանել ուրիշի փոխարեն քվեարկելու համար՝ 2-5 տարի ազատազրկում։ Պատժել նաեւ նման խախտման մեջ սուտ մատնության համար, եթե անգամ հայտարարողը սխալ հաղորդում է տվել ոչ դիտավորյալ։ Դա ընդդիմադիր ուժերի կողմից առաջ բերեց կտրուկ բացասական վերաբերմունք, որոնք պահանջեցին փոխել այդ դրույթը մինչեւ 2-րդ ընթերցումը։