Հայաստանի եւ Եվրամիության միջև նոր իրավական փաստաթղթի շուրջ բանակցություններում դեռ կան զգայուն հարցեր, որոնց շուրջ դեռեւս չկա համաձայնություն: Այս մասին, այսօր՝ հոկտեմբերի 24-ին, լրագրողների հետ հանդիպման ժամանակ նշել է ՀՀ տնտեսական զարգացման եւ ներդրումների փոխնախարար Գարեգին Մելքոնյանը՝ ներկայացնելով Հայաստանում այսօր մեկնարկած «ԵՄ-ն բիզնեսի համար» խորագրով միջոցառումների շարքը:
«Այս օրերին ՀՀ-ում կազմակերպում ենք առեւտրի ոլորտում բանակցությունների 4-րդ փուլը։ Ընթացքը շատ դրական եւ կառուցողական է։ Վերջին ամիսներին եկել ենք շատ հարցերում ընդհանուր համաձայնության։ Կան հարցեր, որոնք նեղ մասնագիտական են եւ դեռ բանակցությունները գնում են։ Այո, կան զգայուն հարցեր, որոնց շուրջ եւս հույս ունեմ կգանք ընդհանուր հայտարարի։ Քննարկում ենք ապրանքների առեւտրին առնչվող, մաքսային հարցեր, առեւտրի տեխնիկական խոչընդոտները, սերտիֆիկացիան, տեխնիկական կանոնակարգումը, մտավոր սեփականության պաշտպանությանը, պետական գնումներին, պետական մասնակցությամբ ընկերություններին, ծառայությունների առեւտրին, մրցակցությանը վերաբերող հարցեր եւ այլն»,-ընդգծեց Մելքոնյանը:
Նա հույս հայտնեց, որ հնարավոր կլինի սկսել բանակցությունները նաեւ ներդրումների մասով»:
Ինչ վերաբերում է ժամկետներին, փոխնախարարն ասաց, որ շատ ավելի կարեւոր է համաձայնագրի բովանդակությունը. «Այն բավական ծավալուն է, մեծ թվով ոլորտների է առնչվում։ Սա չի նշանակում, որ ժամկետները երկրորդական են, ունենք լավ ընթացք եւ հուսով եմ, տեսանելի ապագայում կբերենք տրամաբանական ավարտի»: Գարեգին Մելքոնյանն ընդգծեց, որ այս պահին դժվար է ժամկետներ նշել:
