Կառավարությունում լռում են, թե Հայաստանի վարչապետ Տիգրան Սարգսյանի հանդիպումները քաղաքական ուժերի հետ` Կառավարության ծրագիրը քննարկելու շրջանակններում, ավարտվե՞լ են, թե՞ կլինեն նոր հանդիպումներ:
Տիգրան Սարգսյանի մամուլի քարտուղարի պաշտոնակատար Հարություն Բերբերյանը NEWS.am-ի թղթակցի հետ զրույցում ասաց, որ հունիսի 12-ին, վարչապետը հանդիպել է ԱԺ անկախ պատգամավոր Էդմոն Մարուքյանի եւ Արայիկ Գրիգորյանի հետ` քննարկելու Կառավարության գործունեության ծրագրի հիմնադրույթները:
Նա չմեկնաբանեց հարցը, թե Տիգրան Սարգսյանի հանդիպումները կարելի է փակվա՞ծ համարել, թե դեռ էլի հանդիպումներ են լինելու:
Ավելի վաղ NEWS.am-ը հայտնել էր, որ վարչապետ Տիգրան Սարգսյանը հանդիպել է ՀՀԿ, ՕԵԿ, ԲՀԿ, «Ժառանգություն», ՀՅԴ խմբակցությունների ներկայացուցիչներին` քննարկելու կառավարության ծրագրի դրույթները:
Հայաստանի վարչապետ Տիգրան Սարգսյանը հրավեր չի ուղարկել Հայ ազգային կոնգրեսի ԱԺ խմբակցությանը` Կառավարության ծրագիրը քննարկելու համար: NEWS.am-ի թղթակցին հայտնեցին Կառավարության լրատվական ծառայությունից դա մեկնաբանել էին հետեւյալ կերպ. «Հայ ազգային կոնգրեսի ԱԺ խմբակցության ղեկավար Լեւոն Զուրաբյանի այն հայտարարությունը, որ երբ Կառավարությունն իր ծրագիրը ներկայացնի, ՀԱԿ-ը դեմ է քվեարկելու, ի սկզբանե փակուղի է տանում ծրագրի հնարավոր քննարկումը Հայ ազգային կոնգրեսի եւ Հայաստանի կառավարության միջեւ»,-նշել են Կառավարությունում:
