Թեհրանի նկատմամբ պատժամիջոցները հանելու հարցը կքննարկվի այն բանից հետո, երբ Իրանը որոշակի քայլեր կանի բանակցությունների մասնակիցներին ընդառաջ: Այդ մասին Մոսկվայում լրագրողների հետ հանդիպմանը հայտարարել է ԵՄ դիվանագիտության ղեկավարի ներկայացուցիչ Մայքլ Մանը:

Պատասխանելով իրանցի լրագրողի հարցին, թե պատրաստ է արդյոք Բրյուսելն առաջինը դադարեցնել պատժամիջոցները, ԵՄ դիվանագիտության ղեկավարի ներկայացուցիչը նշել է. «Առաջին հերթին ցանկանում ենք ընդառաջ քայլ տեսնել»: Նա եւս մեկ անգամ հաստատել է հուլիսի 1-ից Իրանի նկատմամբ նավթային բեռնարգելք կիրառելու ԵՄ մտադրությունը:

Միաժամանակ Մանը չի կարծում, որ իրանական միջուկային ծրագրի մասին «վեցյակի»  բանակցությունները, որոնք տեղի են ունենում հունիսի 18-19-ին Մոսկվայում, կավարտվեն որեւէ վերջնական համաձայնագրի ստորագրմամբ, գրում է «ՌԻԱ Նովոստին»:

Պատասխանելով Մոսկվայում «վեցյակի»  բանակցությունների ընթացքում քննարկվելիք առաջարկների մասին հարցին, նա նշել է. «Դրանք հրապարակային առաջարկներ չեն, բայց, դժբախտաբար , հայտնվել են մամուլում»: Նա հաստատել է ուրանի մինչեւ 20% հարստացումը, ինչպես նաեւ` «Ֆորդու» գործարանի աշխատանքը դադարեցնելու պահանջը:

Հիշեցնենք, ռուսական «Կոմերսանտ» թերթը, վկայակոչելով դիվանագիտական աղբյուրները, հաղորդել էր, որ Իրանին կառաջարկեն ուրանի հարստացումը նվազեցնել  5%-ի:

Իր կողմից Իրանի պատվիրակության ներկայացուցիչը հույս է հայտնել, որ Բաղդադում հնչեցված իրենց առաջարկները  «վեցյակը» դրական կընկալի: Սակայն Մոսկվայում «վեցյակի» եւ Իրանի միջեւ բանակցություններում առաջընթացի հավանականությունը նա գնահատել է որպես նվազագույն:

Հունիսի 18-ին Մոսկվայում սկսվել են ԵՄ անվտանգության քաղաքականության եւ արտաքին գործերի գերագույն ներկայացուցիչ Քեթրին Էշթոնի եւ Իրանի Ազգային անվտանգության գերագույն խորհրդի քարտուղար Սայիդ Ջալիլիի բանակցությունները իրանական միջուկային ծրագրի վերաբերյալ` «վեցյակի» քաղտնօրենների մասնակցությամբ: Ինչպես սպասվում է, մոսկովյան հանդիպման մասնակիցները երկու օրվա ընթացքում կքննարկեն Իրանի միջուկային ծրագրի կարգավորման տարբերակները:

Քննարկման ավարտից հետո հունիսի 19-ին նախատեսված են Էշթոնի եւ Ջալիլիի երկու առանձին մամլո ասուլիսները: