A/H1N1 գրիպով վարակվածների թիվը դեկտեմբերի 21-ի դրությամբ Հայաստանում հասել է 104-ի: Այդ մասին NEWS.am-ի թղթակցի հետ զրույցում նշեց առողջապահության նախարարի օգնական Շուշան Հունանյանը:
Նրա խոսքով, այս օրերին զգալիորեն կրճատվել են «շտապօգնության» կանչերի թիվը, նաեւ կրճատվել են դպրոցական տարիքի երեխաների մոտ շնչառական հիվանդությունները, ինչը պայմանավորված է դպրոցներում դասերի դադարեցմամբ:
Հանրապետությունում շարունակվում են վտանգավոր գրիպը կանխարգելելու միջոցառումները: Հունանյանը նաեւ հայտնել է, որ երկրում չի գրանցվել հիվանդության որեւէ ծանր դեպք, մահվան նոր դեպքեր եւս չկան: Չնայած երկրում խոզի գրիպի վարակի արագ տարածմանը, Հայաստանը պատվաստանյութը ստանալու է միայն հունվարի վերջին:
Հիշեցնենք, որ դեկտեմբերի 14-ին Հայաստանում գրանցվել էին «խոզագրիպից» մահվան առաջին դեպքերը՝ մահացել էին մի հղի կին եւ 28-ամյա մի երիտասարդ:
