Բելգիայի արտգործնախարար Դիդկե Ռեյնդերսը չի բացառել Սիրիայի իրավիճակին միջազգային ռազմական միջամտությունը` ՄԱԿ-ի շրջանակից դուրս:
Նրա խոսքով, որը մեջբերում է Le Soir-ը, ՄԱԿ-ում համառ արգելափակման դեպքում հարկ է դիտարկել դրանից դուրս գտնվող միջամտության հնարավորությունը:
Ռեյնդերսի խոսքով` այդ հարցը կքննարկվի հուլիսի 6-ին Փարիզում` «Սիրիայի բարեկամների» հանդիպմանը, գրում է «ՌԻԱ Նովոստին»:
Միաժամանակ, ՄԱԿ-ում ԱՄՆ մշտական ներկայացուցիչ Սյուզան Ռայսը եւս հայտարարել է ավելի վճռական քայլերի անհրաժեշտության մասին:
«Սիրիայի իրավիճակը վկայում է երկրի խաղաղ բնակչության իրավունքները պաշտպանելու ՄԱԿ-ի ԱԽ-ի կատարյալ ձախողման մասին»,-ընդգծել է նա: Նրա խոսքով` ամոթ է, որ ՄԱԿ-ի ԱԽ-ն շարունակում է դադարի վիճակում մնալ ակտիվանալու փոխարեն:
Համանման կոչ է հնչեցրել նաեւ ՄԱԿ-ում Մեծ Բրիտանիայի մշտական ներկայացուցիչ Մարկ Լայելա Գրանտը, գրում է «ՎԶԳԼՅԱԴ»-ը:
ՄԱԿ-ից ստացվող տեղեկությունների համաձայն` Բրիտանիան, Ֆրանսիան եւ ԱՄՆ-ը Սիրիայի կառավարության հանդեպ պատժամիջոցների նոր բանաձեւի նախագիծ են մշակում:
Նախկինում առաջարկված երկու բանաձեւերը ավելի վաղ արգելափակել էին Ռուսաստանն ու Չինաստանը: